'प्याकेजं हे सहमति यायेमाः’

येँ (झीगु स्वनिगः)

एकीकृत नेकपा -माओवादी)या प्रमुख सचेतक देवप्रसाद गुरुङं सरकारं मेमेगु राजनीतिक दलतलिसे नं सहमति मयासे याकःति कथं लडाकु 'रिग्रुपिङ'यात न्ह्यब्वाकल धाःसा व अवैध जुइ धकाः धयादीगु दु ।
वय्कलं याकःति कथं जक रिगु्रपिङ यात धाःसा अज्वःगु ज्यां संवैधानिक व कानुनी मान्यता काये मफैगु व उकिं यानाः राजनीतिइ अझ हे अप्वः शंका ब्वलनी धयादीगु दु । नेता गुरुङं रिग्रुपिङ यायेगु ज्या तःधंगु मखु धयादिसें वसिबें न्ह्यः मोडालिटी व पुनर्संस्थापना प्याकेजय् सहमति यायेमाः धकाः धयादिल । रिपोर्टर्स क्लबपाखें म्हिगः शनिवाः ग्वसाःग्वःगु साक्षात्कार ज्याझ्वलय् न्वंवासें माओवादीया नेता गुरुङं धयादिल 'सेना समायोजनया ज्या न्ह्यब्वाकेत सहमति यायेमाः, एकपक्षीय कथं न्ह्यब्वाकल धाःसा उकिं बैधानिकता कायेफैमखु, सहमति यानाः ज्या यायेमाः । संविधानय् नं दुगु व्यवस्था फलो यायेमाः ।'

वय्कलं सरकार निर्माणया झ्वलय् माओवादी व मधेसी मोर्चाया दथुइ जूगु प्यंगू बुँदाया सहमति राष्ट्रघाटी व राष्ट्रियताय् दिर्घकालिन लिच्वः लाइगु कथं जूगुलिं उकियात खारेज वा संशोधन यायेमाः धयादिल । माओवादी नेता गुरुङं प्यंगू बुँदाया सम्झौताय् दुगु राष्ट्रघाटी बुँदा संशोधन मयाःतले व लडाकुया ल्वाभः तयातःगु कन्टेनरया ताःचा लःल्हायेगु ज्याया निर्णय लित मकाःतले थःपिं सरकारय् गुगु नं हालतय् वनेगु जुइमखु धकाः स्पष्ट यानादिल । वयकलं आःया अवस्थाय् छु यायेत सरकारय् वनेगु धैगु छता खँ अले वने धुंकाः मेगु हे ज्या जुइगु अवस्थाय् छाय् सरकारय् वनेगु धकाः न्ह्यसः नं तयादिल । नेता गुरुङं १० हजार मेधेसी सनेायात समूहगत समायोजन यानाः ब्यागलं यूनिटया रुपय् तयेगु, सिडियोयाके दुगु अर्धन्यायीक अधिकार अन्त्य यानाः मधेसीय् ब्यागलं सुरक्षा संरचना निर्माण यायेगु, नागरिकता वितरणयात सरल दयेेकेगु व जःलाखःला देय्या पेन्डीङ जुयाच्वंगु प्रस्तावयात पारित यायेगु थें ज्याःगु ज्या हे राष्ट्रघाटी खः धकाः दावी नं यानादिल । अथे हे एमालेया पोलितब्यूरो दुजः प्रकाश ज्वालां सरकार निर्माणया झ्वलय् जूगु प्यंगू बुँदाया सम्झौतायात गुगु नं हालतय् कार्यान्वयन याके बिइगु जुइमखु धकाः घोषणा यानादिल ।