कुमारी माजुया नं मुखः दु ला?
दरशा नेवाःमि
थ्व न्ह्यसः ब्वँमिपिनि न्ह्यःने तयाच्वना । कुमारी माजुयात मुखलं पुइकेगु परम्परा दःसा थ्वहे वेबसाइटपाखें लिसः बिइ धैगु भलसा कासें थ्व च्वसु च्वयाः इनाप यानाच्वना । थन छाय् थ्व न्ह्यसलः तयाच्वनागु धाःसां पश्चिमी समाजय् नेपाःया कुमारीयात मुखलं पुइके माःगु खँ प्रचार वयाच्वंगु दु । तर जिं सिउ कथं कुमारीयात मुखलं पुइकूगु मखना ।
खँ छु धाःसा हिमाली भाय् बारे लण्डन विश्वविद्यालयय् जूगु सम्मेलन व पासा पुचः गुथि यूकेया ब्वनाय् जूगु तःनेवाः मुनाय् विश्व नेवाः संघया नायःया हैसियतं वंगु दँय् सेप्टेम्वर १ - १० तारिखतक बेलायत वना । बेलायत भ्रमण यायेवं ब्रिटिश म्युजियम स्वःमवनीपिं म्हो हे जक दइ । हिमाली भाय्या सम्मेलनय् ब्वति काकां सेप्टेम्वर २ तारिखखुन्हु स्वघौ प्यघौ बिकाः काश्मिरया प्रा. नाजिर घरनापं म्यूजियम स्वः वना । अन ब्वया तःगु नेपाःया शाखाय् यक्व वस्तुत मध्यय् हिरा मोति पन्नन भिंपू व पूनं छाय्पिया तःगु वहलय् लुं सियातःगु मुकुट (क्राउन) अथवा मुखलय् जिगु मन क्वसाल ।
ब्रिटिश म्यूजियमय् तयातःगु उगु मुखःया विवरणय् कुमारी माजुयात पुइकीगु क्राउन अथवा श्रीपेच धयातःगु दु । उकिं थ्व च्वसुइ दुगु किपा स्वयाः सम्वन्धित आधिकारिक व्यक्तिपिंसं खःमखु पाय्छिगु लिसः बियाः ग्वहालि यानादी धइगु आशा याना ।
हिरामोति जायेका तःगु थ्व मुखः आःया बजार भावं मू हे मदु । अन तया तःगु विवरण कथं व मुखः सन् १९६१ निसें थुगु म्यूजियमया अधिनय् दुगु जुयाच्वन । सर फ्रान्सिस ओपनहाइमर नांम्ह व्यक्तिं लःल्हाना म्यूजियमय् तयेका तःगु खँ धयातःगु दु । अले च्वयातःगु विवरण कथं थ्व मुखः सन् १८५० - ९० तकया दुने दयेकूगु जुइमाः धकाः अनुमान यानातःगु दु । नेवाः कला कृतिया विशिष्ट श्रेणीया नमूनाया रुपय् ब्वयातःगु थ्व मुखतं कुमारी बारे यक्व अनुसन्धान याइपिंत आपालं खँ सीके फीगु अनुमान याये थाय् दु ।
थज्याःगु बहुमुल्य बस्तु विदेशया म्यूजियमय् यक्व थ्यनेधुंकुगुलिं नेपालय् लित हयेगु भाला काये फत धाःसा झीगु कलाया मौलिकता झीगु हे देशय् ल्यंका तये फइगु खः । तर वर्तमान सरकारया मछालापूगु पहलं यानाः अज्याःगु वस्तु नेपालय् सुरक्षित याना तयेगु हे सरकारया क्षमता मदयेधुंकल । उकिं विदेशय् हे तयातःसा ल्यनाच्वनी परन्तु तकं । गुथि संस्थानं देवदेवतापिंथाय् छापा तःगु गुलि नं तिसात दु गन गन थ्यन जुइ धकाः अनुमान यानाः मालेगु ई न्ह्यःने वयाच्वंगु दु, ध्यान वनेमाःगु दु ।
News Location:
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
