'थ्व ला ट्रेलर जक खः'
थौं संसदयात प्रम बाबुराम भट्टराईया न्हापांगु संवोधन
येँ (सन्ध्या टाइम्स)/प्रधानमन्त्री डा. बाबुराम भट्टराईं थौंकन्हय् देय्या थीथी थासय् छापा मारे यानाः नसा-त्वँसा परीक्षण यायेगु गुगु ज्या सुरु जूगु खः थ्व ला 'ट्रेलर' जक खः, थ्व स्वयां तःधंगु ज्या अझ जुइ तिनि धयादीगु दु।
प्रधानमन्त्री जुइधुंकाः थौं संसदय् न्हापांगु संवोधन यासें प्रधानमन्त्री भट्टराईं जनतायात तुरुन्त हे राहत बीमाःगु खँयात वाःचायेकाः थुज्वःगु ज्याखँत न्ह्याकागु खः, तर थुलि जक प्रयाप्त मखु, थ्व ला 'ट्रेलर' जक खः धकाः वय्कलं स्पष्ट यानादिल ।
राहत कार्यक्रम घोषणाया ज्या संसदं मयासे पिने पत्रकार सम्मेलन यानाः यात धकाः सभामुखं असन्तोष प्वंकूगु खँयात संवोधन यासें वय्कलं धयादिल, 'जिं संसदपाखें हे घोषणा यायेगु बिचाः यानागु खः, तर अबलय् संसदया बैठक मच्वनागु अवस्था दुगु व मेखे जनतायात राहत बीगु ज्याय् छफुति हे ई सितिकं छ्वये मजिउ धइगु बोध जूगुलिं जिं तत्काल उगु ज्या न्ह्याकागु खः ।'
संविधानसभाया चुनावय् फुक्कं पार्टी मिले जुयाः वनेमाः धइगु हे जनादेश वःगु जूगुलिं थ्व इलय् सुं नं पार्टी विपक्षय् च्वने मजिउ धकाः नं वय्कलं धयादिल। आः वइगु स्वलाया दुने शान्ति व संविधान सफल यायेगु लागिं नापं जानाः ज्या यायेत वय्कलं नेपाली कांग्रेस व एमालेयात नं आह्वान यानादिल ।
'माफी मफ्वंसा पार्टी तज्याइ'
माओवादीया असन्तुष्ट नेता मोहन वैद्य पक्षधर सचिव सीपी गजुरेलं ल्वाभः तयातःगु कन्टेनरया ताःचा लःल्हाःगु खँय् अध्यक्ष प्रचण्डं माफी मफ्वन धाःसा पार्टी तज्याये नं फु धयादीगु दु। थौं सिन्धुलीमाडीइ पत्रकारत लिसे खँ ल्हासें वय्कलं धयादिल, 'यदि क्रान्तियात फाइदा जुइगु खःसा फुट नं पाय्छि खः ।'
