नेवाःतय् लागिं बजेट तयेगु अर्थमन्त्रीया बचं
येँ (सन्ध्या टाइम्स)/न्हूगु बजेटय् नेवाःतय् भाषा साहित्य उत्थानया लागिं नं बजेट फ्यायेत नेवाः न्ह्यलुवातय्सं याःगु इनापयात स्वीकार यासें अर्थमन्त्री वर्षमान पुन 'अनन्तं' थम्हं उकिया निंतिं कुतः यायेगु बचं बियादीगु दु ।
नेवाः स्वायत्त राज्य मंकाः संघर्ष समितिं म्हिगः वय्कःयात नापलानाः राष्ट्रिय विभूति शंखधर साख्वाःया नापं कोष दयेकेगु, नेवाः साहित्य भाषा संस्कृतिया लागिं बिस्कं कोष दयेकेगु व नेपालभाषा एकेदेमियात सरकारं बिया वयाच्वंगु अनुदान अप्वयेकेत माग याःगु खः ।
संघर्ष समितिया नायः डा. चुन्दा बज्राचार्यया नेतृत्वय् वंगु उगु पुचलं थ्व इनाप याःगु खः। संघर्ष समितिया सचिवालय कजि मल्ल के. सुन्दरंउगु कोष नीस्वनेत प्रधानमन्त्री डा. बाबुराम भट्टराई नाप जूगु खँल्हाबल्हा बारे नं कनादीगु खः ।
प्रतिनिधिमण्डलय् संघर्ष समितिया दुजःपिं दिलीप महर्जन, दिल बहादुर श्रेष्ठ, नरेश ताम्राकार, सत्यनारायण महर्जन, मंगल महर्जन, राजेश शाक्यपिं नं दीगु खः ।
