सुचं बियाः आकस्मिक भ्रमण !
येँ (सन्ध्या टाइम्स)/छुं ई न्ह्यः तिनि निवर्तमान स्वास्थ्यमन्त्री लोकेन्द्र बिष्ट निरीक्षणय् वंबलय् नर्सं झपारे याःगुलिं चर्चित जूगु वीर अस्पतालं म्हिगः धाःसा वर्तमान स्वास्थ्यमन्त्री राजेन्द्र महतोयात चकित याना बिल। धायेत ला म्हिगः अस्पतालय् मन्त्रीया आकस्मिक भ्रमण जुइ धाःगु खः। तर मन्त्री अस्पताल थ्यंबलय् धाःसा अन अस्पतालया पदाधिकारी बेपत्ता मखु ल्हातय् स्वां ज्वनाः लुखाय् हे मन्त्रीयात लसकुस यायेत पियाच्वन। आकस्मिक धाःगु भ्रमणयात थुकथं लसकुस याःगु खनाः मन्त्री नापं वंपिं पत्रकारत दकलय् अप्वः चकित जुल ।
सूत्रया कथं मन्त्री महतो आकस्मिक भ्रमणय् वयेत्यंगु दु धकाः वय्कःया कार्यकर्तातय्सं अस्पतालयात न्ह्यव हे जानकारी बियातःगु जुयाच्वन। वहे कारणं अस्पतालया फुक्क हे पदाधिकारीत गनं मवँसे मन्त्रीया लसकुस यायेत दनाच्वंगु खः ।
