आखिर झीसं छु जक नयाच्वनागु जुल?

नेपाःया थीथी शहरय् चायेका तःगु बांबांलाःगु व नां चले जूगु पसलय् तकं उद्योग वाणिज्य विभागं 'युद्धस्तर' य् याःगु अनुगमनं वास्तवय् झी नेपाःमितय्सं नसात्वँसाया नामय् गज्याःगु पदार्थ नयाच्वनागु जुयाच्वन धइगु खँ सार्वजनिक जूगु दु। मरिचरि, ला, मसला, लः जक मखु मस्तय्त त्वंके माःगु दुरु समेत नये मजीक उत्पादन जुयाच्वंगु खँ थ्व अनुगमनया झ्वलय् सी दया वःगु दु। वास्तवय् थुगुसी याःगु थ्व अनुगमनपाखें यक्वसित थारान्हुइका बिउगु दुसा आपालं मनूतय्त सतर्क नं याना बिउगु दु ।

खतुं उद्योग विभागपाखें थज्याःगु अनुगमन न्हापा न्हापा नं मयाःगु मखु। तर अबलय् याइगु अनुगमन क्यने थें जक जुइगु। थुगुसी मिडियायात समेत नापं तयाः अनुगमन याःगुलिं उकिं उपभोक्तायात सतर्क व मखुगु ज्या याइपिंत सचेत नं याना बिउगु दु। उद्योग मन्त्रालयं नियमित हे यानाच्वने माःगु छता ज्या थुकथंया बजार अनुगमन नं खः। तर मन्त्रालयया थ्व पक्ष तकं फ्यासु। आः याःगु ज्यायात यक्वस्यां समर्थन व ग्वाहालि समेत याःगु कारणं थुकियात निरन्तरता बीगुपाखे मन्त्रालयं ध्यान बीमाःगु आवश्यकता दु ।

मन्त्रालयपाखें थुगुसी याःगु अनुगमन च्वछायेबहः ला जु हे जू, आः थुकी कानून अःखः ज्या याःपिंत ज्वनाः सी दयेक हे कारवाही नं यानाः क्यनेमाः। यदि उमित छुं हे कथंया कारवाही मजुल धाःसा कानून अःखः ज्या याइपिं मनूत प्रोत्साहित जुइगु ला जु हे जुल, उकिया नापनापं लिपा लिपा सरकारं याइगु बांलाःगु ज्यायात नं जनतां पत्याः यायेगु त्वःता हइ। थुकी सक्रिय जूपिं कर्मचारीतय्त राज्यं नं प्रोत्साहन यायेमाः ।

More Stories Like this