मन्त्री जुइत पार्टी पार्टीइ कचवं
नेकां व फोरमय् नं ल्वापु
येँ (सन्ध्या टाइम्स) / सरकार गठन प्रक्रिया न्ह्यानाच्वंगु इलय् नेपाली कांग्रेस व मधेशी जनअधिकार फोरम दुने सुयागु नेतृत्वय् सरकारय् वनेगु धइगु बारे पिदंगु विवाद अझं जारी दनि ।
न्हूम्ह प्रधानमन्त्रीया सपथ ग्रहण लिपा थौं हे चीधंगु आकारया मन्त्रिमण्डल दयेकेगु धकाः एमाले व कांग्रेसं तयारी याःगु खःसां कांग्रेस दुनेया मतभेदं यानाः कांग्रेसया मन्त्री- तय् नां धाःसा प्राप्त मजूनि । गुकिं यानाः थौं प्रधानमन्त्री व एमालेया निम्ह मन्त्रीतय्सं जक राष्ट्रपति भवनय् सपथ ग्रहण यात ।
सूत्रतय्सं बिउगु जानकारी कथं नेपाली कांग्रेसया सभापति गिरिजा प्रसाद कोइरालां रामचन्द्र पौडेलया नेतृत्वय् सरकारय् वनेमाः धइगु बिचाः बियादीसां वरिष्ठ नेता शेरबहादुर देउवां धाःसा उकी असन्तुष्टि प्वंकादीगु दु । देउवाया असन्तुष्टिं यानाः कांग्रेसं थौं नं थःपाखें मन्त्री जुइपिनि नां छ्वये मफुत ।
देउवा पक्षं उपसभापति प्रकाशमान सिंहया नेतृत्वय् सरकारय् वनेमाःगु अडान कयाच्वंगु दु । देउवा पुचः दुने हे सरकारया नेतृत्व यायेगु लागिं महामन्त्री विमलेन्द्र निधिया नां नं वयँच्वंगु दु ।
सभापति कोइरालां सरकारय् वनीपिं नेतात धकाः तयार याःगु नां धलखय् सुशील कोइराला डा. रामशरण महत व थः हे म्ह्याय् सुजाता कोइरालाया नां दुथ्यानाच्वंगु दु ।
सरकारय् वनीपिं नेताया बारे कांग्रेस दुने विवाद ब्वलनेवं आः कांग्रेसं थःगु भागय् वइगु मन्त्रालयत स्पष्ट जुइधुंकाः जक सरकारय् सहभागी जुइगु निर्णय याःगु खँ सीदुगु दु । सरकारय् वनीपिनि नांया बारे हे सहलह यायेत थौं कांग्रेस केन्द्रीय समितिया अनौपचारिक बैठक नं च्वनेत्यंगु दु ।
उखे सरकारय् वनेगु विषयय् मधेशी जनअधिकार फोरम दुने ब्वलंगु विवाद नं अझं क्वलाःगु मदुनि । पार्टी दुने सुयागु नेतृत्वय् सरकारय् वनेगु धइगु विवादय् अझं बहस जुयाच्वंगु दनि । थ्व बारे निर्णय यायेत आः केन्द्रीय बैठक च्वनेगु तयारी यानाच्वंगु खँ सीदुगु दु । फोरमय् अध्यक्ष उपेन्द्र यादव पक्षधरतय्सं सहअध्यक्ष जेपी गुप्ताया नेतृत्वय् सरकारय् वनेमाः धयाच्वंगु दुसा वरिष्ठ नेता विजय गच्छेदारं थःगु हे नेतृत्वय् सरकारय् वनेगु दावी यानाच्वंगु दु ।
लिसें फोरमं गृह मन्त्रालय थःपिंत माः धकाः माग यानाच्वंगु खँ नं सीदुगु दु । गृहय् कांग्रेसं नं दावी यानाच्वंगु खःसां आः एमालें उपाध्यक्ष विद्या भण्डारीयात गृहमन्त्री दयेकेगु तयारी यानाच्वंगु दु ।
मन्त्रिमण्डलय् एमाले व कांग्रेसयात खुगू खगू फोरमयात प्यंगू तमलोपायात निगू व सद्भावना माले व संयुक्तयात छगू छगू मन्त्रालय बीगु सहमति जूगु खँ सीदुगु दु ।
