आः प्रचण्डया ध्यान लुम्बिनीइ

प्रचण्डया नेतृत्वय् लुम्बिनी विकासया ज्या न्ह्याइगु

येँ (सन्ध्या टाइम्स)/बुद्ध जन्मभूमि लुम्बिनीइ चीनय् केन्द्रीय ज्याकू दुगु एपेक नांगु संस्थापाखें खर्बौं लगानी यानाः सुरु यायेत्यंगु निर्माण सम्बन्धी ज्याय् थः हे सक्रिय जुयाः लगे जुइगु खँ उगु संस्थाया न्वकु लिसें एनेकपा (माओवादी) या अध्यक्ष प्रचण्डं कनादीगु दु ।

लुम्बिनीइ एपेकपाखें करिब स्वंगू खर्ब तका लगानी यायेगु धकाः नकतिनि घोषणा याःगु खः। उगु घोषणा एपेकया अन्तर्राष्ट्रिय कमिटीपाखें याःगु खःसा लुम्बिनीइ ज्या सुरु यायेगु लागिं छगू राष्ट्रिय कमिटी नं दयेकीगु व उगु राष्ट्रिय कमिटीया संयोजक थः हे जुइगु जानकारी नं अध्यक्ष प्रचण्डं बियादीगु दु। ज्या न्ह्याकेगु लागिं आः राष्ट्रिय समिति दयेकेगु पहल जुयाच्वंगु दु ।

अध्यक्ष प्रचण्डलिसे देय्या थीथी समसायिक राजनीति बारे खँ ल्हायेत म्हिगः वय्कःयात नापलाः वंगु नेपाः राष्ट्रिय पार्टीया प्रतिनिधिलिसे खँ ल्हासें वय्कलं थ्व खँ कनादीगु खः। नेपाः पार्टीया नेतातलिसे खँ ल्हासें वय्कलं धयादिल, 'जि ला आः थुकी हे लगे जुइगु ।'

अध्यक्ष प्रचण्डं संसारय् शान्ति स्थापनाया लागिं पश्चिमा शक्तिं थीथी सैन्य संगठनत दयेकाः यानाच्वंगु कुतः विफल जूगुलिं आः पूर्वया दर्शनपाखें विश्व शान्ति कायम यायेमाली धइगु सोच विश्वन्यंकं वयाच्वंगु व अज्याःगु सोचया केन्द्रविन्दू धाःसा बुद्ध बूगु थाय् लुम्बिनी हे जुइगु खँ नं कनादिल। विश्व शान्ति कायम यायेगु ज्याय् पश्चिम असफल जुल, आः पूर्वयात अवसर बीमाः धइगु सः थ्वयाच्वंगु कारणं नं लुम्बिनीया भविष्य बांलाःगु खँ वय्कलं कनादिल ।

लुम्बिनीइ आः जुइगु निर्माण लिपा थ्व थाय्यात संसारया गुगुं नं थासय् शान्ति कायम याये माल व उकिया लागिं शान्ति वार्ता याये माल धाःसा वार्ता याः वयेगु स्थल दयेकेगु तकया ताः तयातःगु खँ नं अध्यक्ष प्रचण्डं कनादिल ।

नालन्दायात म्वाका हयेगु भारतया पहल
विश्वशान्तिया ख्यलय् वयाच्वंगु थ्व हिउपालय् योगदान बीत भारत नं सक्रिय जुयाच्वंगु खँ उगु प्रतिनिधि मण्डलय् दुथ्याःम्ह नेपाः पार्टीया अध्यक्ष डा. केशवमान शाक्यं कनादीगु दु। भारतं थःगु देशय् च्वंगु ऐतिहासिक नालन्दा विश्वविद्यालययात हानं न्हापा थें हे संचालनय् हयेगु व थुकियात विश्वया हे एक नम्बरया शिक्षण संस्था दयेकेगु लागिं पहल यानाच्वंगु जानकारी नं डा. शाक्यं बियादिल ।