'कब्जा यानातःगु जग्गा लित बी मते'
येँ (सन्ध्या टाइम्स)/एकीकृत माओवादीया नेतृत्वय् दुगु वर्तमान सरकारं पार्टीं कब्जा यानातःगु जग्गा लित बीगु धकाः याःगु घोषणायात माओवादीया हे नेता कार्यकर्तातय्सं अस्वीकार यासें बैकल्पिक व्यवस्था मयाःतले अज्याःगु सम्पत्ति लित बी मते निर्देशन समेत बिउगु दु ।
माओवादी भातृ संगठन अखिल नेपाल किसान महासंघ (क्रान्तिकारी) या महासचिव नन्दबहादुर बुढामगरं म्हिगः बहनी छगू प्रेस बिज्ञप्ति पिथँसें थः मातहतया कार्यकर्तातय्त अज्याःगु निर्देशन बियादीगु खः। किसान महासंघया विज्ञप्तिइ माओवादी पार्टीं बिनाशर्त छेँ जग्गा लित बीगु धकाः निर्णय याःगु हे मदु धासें सुकम्बासी, हरुवा, चरुवा, हली, गोठाला व भूमिहिन किसानतय्त बैकल्पिक व्यवस्था मजुइकं अज्याःगु जग्गा लित बी फइ मखु धयातःगु दु ।
थ्व हे दथुइ म्हिगः प्रधानमन्त्रीया राजनीतिक सल्लाहकार देबेन्द्र पौडेलं किसान महासंघ क्रान्तिकारीया केन्द्रीय पदाधिकारीतय्त नापलानाः थुकिया बारे सहलह ब्याकादीगु खःसा उगु इलय् पौडेलं मिडियाय् वः थें थःपिंसं बिनासर्त लित बीमाः धयागु मखु धासें किसान, सुकम्वासी, हली, गोठाला लगायतया विषयय् प्रधानमन्त्री लिसे सहलह ब्याकेगु जुइ धकाः जानकारी बियादीगु खँ छम्ह किसान नेतां कनादीगु दु ।
