नवलपरासीइ कब्जा जग्गा लित मबीगु
येँ (सन्ध्या टाइम्स)/माओवादी समर्थित अखिल किसान महासंघ (क्रान्तिकारी) नवलपरासी कब्जा यानाः भूमिहिन किसान सुकुम्बासी व किसानतय्त वितरण यायेधुंकूगु जग्गा गुगुं हालतय् नं लित मबीगु खँ धाःगु दु। एनेकपा (माओवादी) नेतृत्वया सरकारं जग्गा लित बीगु धकाः निर्णय याः कुन्हु हे संघया नवलपरासी इकाइं थज्याःगु प्रतिक्रिया बिउगु खः ।
क्रान्तिकारी भूमिसुधार मयासे जग्गा जक लित बीगु खँ वःगुलिं थुकिं समस्या समाधान जुइ मखु धासें संघं भूमिहिन सुकुम्बासी व किसानया हितय् निर्णय यायेत आयोग गठन यायेत नं माग याःगु दु। संघया जिल्ला उपाध्यक्ष नीलकण्ठ खनालं सरकारं मोही किसानया पक्षय् ज्या यायेमाःगु बिचाः नं प्वंकादीगु दु ।
जनयुक्तया इलय् जमिन्दार व सामन्तवर्गया जग्गा कब्जा याना तःगुली आः अज्याःगु जग्गा लित बीगु निर्णय यानाः सरकारं सुकुम्बासी समस्या प्रति मिखा तिसिउगु द्वपं नं वय्कलं बियादीगु दु। सरकारं म्हीग मंगलवाः तिनि माओवादीं कब्जा यानातःगु जग्गा लित बीगु धकाः निर्णय याःगु खः। तर माओवादी दुने हे उकियात कयाः विवाद पिहां वःगु दु ।
