सिक्किमय् यँयाः



जःलाखःला देय् भारतया सिक्किम प्रान्तय् नं थुगुसी झःझः धायेक यँयाः नखः न्यायेकल। येँया वर्तमान लाय्कू कुमारीया किपायात खतय् तयाः साला यंकुसें उगु जात्रा याःगु खः ।

यँयाः पुन्हि कुन्हु सुथय् अनया भानुभक्त पार्कय् मुनाः सिक्किमया गुरु सूर्यवीर तुलाधरं मंकाः पुजा यासें रथ यात्रा न्ह्याकल। उगु रथ यात्राया न्ह्यःने ग्वसाः खलः सिक्किम नेवाः गुथिया ब्यानर व वयां लिउने भोंतं वंगु गुंला बाजं, सिक्किमया हे धिमे बाजं, अष्टमातृका, लाखे, झ्यालिंचा लिसें आपालं मनूतय्सं कुमारीया खः सालाः जात्रा याःगु खः। सिक्किमया तिब्बतरोड, एमजी रोड आदि चाःहिलाः अनया हे कम्युनिटी हलय् ज्याझ्वः क्वचायेकल ।

वयां लिपा बहनी स्थानीय युनिभर्सिटी हलय् यँयाःया हे लसताय् प्रवचन व सांस्कृतिक ज्याझ्वः जुल। सिक्किम सरकारया मानव संशाधन मन्त्री एम.के. प्रधान मूपाहां कथं झाःगु खःसा सिक्किम नेवाः गुथिया मू संरक्षक के.सी. प्रधानं सभापतित्व यानादीगु खः। कल्पना प्रधानं लसकुस यासें न्ह्याकुसें न्ह्याकूगु उगु ज्याझ्वलय् सिक्किम नेवाः गुथिया नायः आर. के. प्रधानं नं संवोधन यानादीगु खः ।

अन जूगु सांस्कृतिक ज्याझ्वलय् सिक्किमया डेन्टाम, मल्लिडाँडा आदि थाय्या नेवाःतय्सं थीथी हुलाप्याखं आदि न्ह्यब्वःगु खःसा नेपालं वंपिं पवित्र कसाः व दिपा महर्जनं म्येँ न्यंकादीगु व बुद्धलक्ष्मी शाही लिसें समीर प्रजापतिं हुला प्याखं न्ह्यब्वयादीगु खः ।

उगु हे ज्याझ्वलय् नेवाः भाषा व संस्कृति उत्थानया ज्याय् योगदान यानादीपिं थीथी व्यक्तित्वपिंत हनेगु ज्या नं जूगु खः। सिक्किमय् वंगु छुं दँ न्ह्यवंनिसें कुमारीया किपा तयाः यँयाः जात्रा न्यायेकेगु याना वयाच्वंगु खःसा थुगुसी सिक्किमया प्यंगुलिं लागाया नेवाःतय्सं झःझः धायेक न्यायेकूगु खः ।