थुगुसीया विविधभाषा सम्मेलन छ्वासः त्वालय् याइगु

थिमि (सन्ध्या टाइम्स)/ विविध भाषा साहित्य समाजपाखें दँय्दसं म्हपुजा कुन्हु न्यायेका वयाच्वंगु विविध भाषा साहित्य सम्मेलन थुगुसी नगदेशया छ्वासः त्वालय् न्यायेकीगु जूगु दु। थुगुसी यायेत्यंगु सम्मेलन झिंस्वक्वःगु खः। थ्व सम्मेलनया थिमि नगरपालिका लागाया थीथी त्वालय् सार्वजनिक रुपं यायेगु याना वयाच्वंगु दु। थ्व स्वयां न्ह्यः थुगु हे त्वालय् स्वक्वःगु व गुक्वःगु सम्मेलन नं जुइधुंकूगु दु ।

नेपालय् ल्हाइगु थीथी भासं रचना पाठ यानाः साहित्य सम्मेलन यायेगु थ्व ज्याझ्वःया विशेषता खः। सम्मेलन ताःलाक न्ह्याकेत आकास वाडेया अध्यक्षताय् झिंन्याम्ह दुजः दुगु ग्वसाः खलः नीस्वंगु दु ।

'भाषा कला व संस्कृतिया माध्यमं राष्ट्रिय भावना ब्वलंके नु' धाइगु नारा थ्वयेकाः न्ह्याकीगु उगु ज्याझ्वलय् सुथय् नसंचा उलेगु ज्याझ्वः नं तयातःगु दु। नसंचा उलेगु ज्या व साहित्यिक ज्याझ्वः धेंधेंबल्लाखय् दुथ्याइ। साहित्य विधापाखे कविता, बाखं व निबन्ध विधाय् सिरपाः बीगु क्वःछिनातःगु दु। ज्याझ्वःलिपा बहनी सांस्कृतिक ब्वज्या नं जुइगु खँ ग्वसाः खलकं धाःगु दु ।