छेँबुँ लित बीगु खँय् माओवादी दुने विवाद

सरकार गठन याये न्ह्यः माओवादीं प्वंकूगु प्रतिवद्धता कथं पार्टीं कब्जा यानातःगु छेँबुँ लित बीगु धकाः सरकारं निर्णय यायेवं माओवादी दुनेया हे किसान फाँटया कार्यकर्तातय्सं विरोध याना हःगु दु। थुकिं यानाः छेँबुँ लित बीगु धकाः सरकारं याःगु निर्णय थःगु हे पार्टीया विरोधं यानाः अलपत्र जकं जुइगु खः लाकि धइगु चिउताः ब्वलंगु दु। थ्व स्वयां न्ह्यः लडाकुतय् ल्वाभः तयातःगु कन्टेनरया ताःचा लःल्हायेगु धकाः पार्टीं याःगु निर्णययात नं थःगु पार्टी दुनें विरोध जूगु खः ।

आः कब्जा यानातःगु छेँबुँ लित बीगु धकाः याःगु निर्णययात कयाः नं पार्टी दुने गुगु विवाद पिहां वल, व स्वाभाविक खः। छाय्धाःसां माओवादीं तत्कालिन इलय् जमिन्दारतय् उगु छेँबुँ कब्जा याःगु हे कन्हय् उकियात छेँबुँ मदुपिंत इना बी धकाः खः। देय्या लखौं भूमिहिन किसानतय्त भूमि इनेगु जुइ धकाः हे माओवादीं जनयुद्ध सुरु याःगु खःसा भूमिहिनतय्त भूमि बी धकाः हे आपालं जनतायात जनयुद्धय् सरिक याःगु खः। तर थौं भूमिहिनतय् बारे छुं हे निर्णय मयासे कब्जा यानातःगु बुँ जक खुरुक्क लित बीगु धायेबलय् कार्यकर्तां पतिं धस्वाकीगु स्वाभाविक खः। यद्यपि थुकिया अर्थ थ्व मखु कि यक्व बुँ दुपिनिगु बुँ हे लाका कयाः मदुपिंत इनेगु ज्या यायेमाः। तर बुँ मदुपिंत बीगु धइगु अप्वः दुपिनिगु कयाः हे खः। मदुगु भूमि न्हूगु सिर्जना याये फइ मखु। दुगुयात समान रुपं वितरण यायेगु ज्या जक राज्यं यायेगु खः गुकियात क्रान्तिकारी वा प्रगतिशील भूमिसुधार धयातल। अप्वः दुपिंके छु प्रक्रियापाखें बुँ कायेगु खः, उकिया स्वीकार्य तरिका नं सरकारं तुरुन्त हे पित हयेमाः ।

More Stories Like this