अन्तरदेशीय साहित्यकारपिंत च्वसापासां हन

च्वसापासा नेपालभाषाया दकलय् पुलांगु साहित्यिक संस्था ला ख हे खत, अझ नेपाःया मेमेगु साहित्यिक संस्था स्वयां नं पुलां। थ्व संस्था नीस्वंगुया बिस्कं ऐतिहासिक महत्व व पृष्ठभूमि नं दु। नेपालय् वि.सं. २००७ सालय् प्रजातन्त्र वये स्वयां न्ह्यः हे च्वसापासा नेपालं पिने कलकत्ताय् स्थापना जूगु खः। थ्व संस्था अन नीस्वनादीम्ह झी भाषानिभाः प्रेमबहादुर कसाः जुल। वय्कः थीथी हुनिं नेपालं पिने च्वनादीसां वय्कलं मांभाषाय् सेवा यानादीगुया छगू ग्यसुग्यंगु फल खः, च्वसापासा। उगु इलय् कलकत्ताय् च्वंच्वनादीपिं नेवाः च्वमितय्गु च्वसाया लँपुं पासा दयेकाः उमित छथाय् मुंकेगु तातुनां थ्व च्वसापासा नीस्वंगु खः। उबलय् प्रेमबहादुर कसाःजुं अनं पिदनीगु नेपालभाषाया लय्पौ 'धर्मोदय' पत्रिकाया अन्तरङ्ग सम्पादक जुयाः नं ज्या यानाच्वनादीगु खः ।

नेपालय् प्रजातन्त्र वये धुंकाः वि.सं. २००९ सालय् च्वासापासां हनुमानध्वाखा लाय्कूया नासः चुकय् स्वन्हुयंकं ऐतिहासिक नेपालभाषा साहित्य सम्मेलन यात। नेपालभाषा साहित्य विकास यायेगु, प्रचार-प्रसार व संरक्षण यायेगु आदि मूआज्जु ताःलाकेत साहित्यकारपिं मुनेगु, स्तरीय साहित्यिक कृति पिथनेगु, 'सितु' निलापौ पिथनेगु, साहित्यकारपिनिगु योगदानयात कयाः वय्कःपिंत थीथी पदवीं छाय्पियाः हनेगु, 'श्रेष्ठ सिरपाः' थें जाःगु अतिकं महत्वपूर्णगु सिरपाः नीस्वनेगु व थुकिया हे सक्रियताय् 'पुलांगु नेपालभाषा खँग्वः धुकू निर्माण समिति', जापानी अनुवाद समिति (लिपा साहित्य गुथि) व आशा सफूकुथि थेंजाःगु नेपाःया छगूयां छगू सार्वजनिक अभिलेखालय नीस्वनेगु आदि तःगू हे ज्या थुकिं याःगु दु। थ्व हे झ्वलय् प्रेमबहादुरया इलय् बराबर विदेशी साहित्यकारपिं, विशेष यानाः भारतीय साहित्यकारपिंत थन सःतेगु, साहित्यिक छलफल यायेगु, गोष्ठी यायेगु आदि ज्या नं याना वयाच्वंगु खः। गबलें गबलें थःपिं नं साहित्यिक प्रतिनिधि मण्डलया रुपय् जःलाखःला देशय् चाःहिउ वनेगु नं याः। थ्व हे झ्वलय् तःदँ लिपा जूसां थुगुसी च्वसापासां भारतया थीथी साहित्यकारपिंत येँया भोजन गृहय् लसकुस ज्याझ्वः यात। नेपाल प्रज्ञा प्रतिष्ठानया ब्वनाय् अन्तरदेशीय साहित्य सम्मेलनया नामं छगू ज्याझ्वलय् ब्वति काः झाःपिंत थुकथं नापलायेगु ज्या जूगु खः। च्वसापासाया नायः पद्मरत्न तुलाधरं पाहांपिंत खादा क्वखायेकाः लसकुस यानादीगु उगु ज्याझ्वः वय्कःया हे सभापतित्वय् न्ह्यात। ज्याझ्वलय् दकलय् न्हापां च्वसापासाया छ्यांज्ये भूषणप्रसाद श्रेष्ठं अन दीपिं सकलें नेपालभाषाया साहित्यकारपिनिगु म्हसीका बियादिल।
ज्या�वलय् पाहांपिनिपाखें नुगःखँ न्यनेगु ज्या नं जुल। थुकी न्हापां सिक्किमया साहित्य बारे हर्क थाम्दां नुगःखँ प्वंकादीगु खः। वय्कः छम्ह लिम्बू जूगु नातां सिक्किमय् जुइगु लिम्बू भाय्या गतिविधियात कयाः न्ववानादिल। कलकत्तायाम्ह प्रा.डा. सुबोधकुमार जोस्टं बंगाली साहित्यया बारे चर्चा यानादिसें भारतय् हिन्दी भाषा व साहित्यया बोलवाला दुगुलिं बंगाली साहित्य थौंकन्हय् खतराय् लानाच्वंगु दु धयादिल। अथे हे बनारसय् च्वंम्ह दुर्गाप्रसाद श्रेष्ठं बनारसया नेपाःलिसे यक्व स्वापू दु धकाः कुलादिसें साहित्यिक नापं राजनीतिक ख्यःया प्रेरणाया स्रोतकथं बनारसयात कायेफु धकाः थीथी दसु नं न्ह्यब्वयादिल ।

थुकथं हे गान्तोकया डा. राजेन्द्र भण्डारीं प्रवासय् च्वनाः नं नेपाली साहित्य ह्यःमिपिंसं थीथी ज्याखँ याना वयाच्वंगु न्ह्यथनादिल। नेपाल साहित्य परिषद्, आसामया भवानीप्रसाद शर्मां संसारय् दुगु फुक्क भाषा थःथम्हं पूवनी मखु धयादिसें फुक्कं भाषाया साहित्य उलि हे महत्वपूर्ण जू धकाः नुगःखँ प्वंकादिल। अथे हे दार्जिलिङ्गया कवि मनप्रसाद शुक्लां कविता पाठ यानादिल ।

नेपालभाषा एकेडेमीया चान्सलर सत्यमोहन जोशीं च्वसापासाया इतिहास, नेपालभाषायात राणाकालंनिसें जुया वयाच्वंगु दमन, नेपालभाषाया साहित्यया विकास बारे दुग्यंक खँ कनादीगु खः। ज्याझ्वलय् च्वमि व साहित्यकारपिं डा. तेजरत्न कसाः, प्रा. नर्मदेश्वर प्रधान, सत्यभामा माथेमा, पूर्णबहादुर वैद्य, बुद्ध साय्मि, लक्ष्मण राजवंशी, राजा शाक्य, तिलकप्रकाश कायस्थ, सुलोचना मानन्धर, हरिशंकर रंजितकार, प्रतिसरा साय्मि, नजरराम महर्जन, शशिकला मानन्धर, रीना तुलाधर, नरेशवीर शाक्य आदिपिनिगु उपस्थिति दुगु खः। ईया म्हतिं यानाः साहित्यकारपिनि दथुइ थवंथवय् अन्तर्क्रिया याये मखंगु धाःसा अप्वःसिनं अनुभव याःगु खनेदत ।

More Stories Like this