हलिं नेवाः मुँज्याया नारा लण्डन वने नु

दरशा नेवाःमि

थौंकन्हय् थ्व "सन्ध्या टाइम्स"य् न्हिंन्हिं 'लण्डन वनेगु झीगु सः हलिमय् थ्वयेके नु' धकाः नारा कथं विज्ञापन छापे जुयाच्वंगु दु। थ्व नारा बारे मुक्कं खँ सीकेत गनं छुं सुचं पिहां वयाच्वंगु खने मदु। अले गन स्वापू तयेगु धइगु नं सी मदुगुलिं आपाःसिनं न्ह्यसः तयाच्वंगु व सम्पादकयात च्वःगु पौ नं पिहांवःगु दु। उलि जक मखु ब्वँमिपिं अलमले जुयाच्वन धकाः नेपाः वनाः लिहां वःपिं पासापिंपाखें नं न्यनागु जूगुलिं थ्व बःचाहाकःगु च्वसु च्वयाः सुचं बीगु कुतः यानागु जुल ।

थ्व नारा 'सन्ध्या टाइम्स' न्हिपती जक पिहां वयाच्वंगु मखु। नेपालभाषा एकेदेमीपाखें न्ह्याकाच्वंगु सछि व खुफुति खु मेगाहर्जया 'लबु' ज्याझ्वलय् नेवाः समाचारया नापनापं नं थ्व नारा थ्वयेकाच्वंगु दु। थ्व समाचार 'नेपाल मण्डल डट कम्' य् न्हियान्हिथं हलिंया न्ह्याथासं नं न्यने फइगु जूगुलिं थ्व लण्डन वनेगु नारा हलिंन्यंक हे थ्यनाच्वंगु भाःपीमाः। थ्व नाराया मू आज्जु हे हलिंन्यंकं न्यनाच्वंपिं नेवाःतय्त छथासं मुंकाः छगू तःमुँज्या यानाः हलिंन्यंकं सः थ्वयेकेगु खः ।

थ्वहे वइगु नेपाल संवत् ११३२ न्हूदँ क्यंगु लसताय् अक्टोबरया २९ -३१ तारिख तक जुइगु थ्व न्हापांगु हलिं नेवाः मुँज्या नेवाः भाषा (नेपालभाषा) ख्यः व भिंतुना आन्दोलनया दकलय् लिपांगु सफलता भाःपीमाः। थ्व मुँज्यां हलिमय् नेवाःतय्गु न्हूगु छगू संस्थाया उलेज्या नेपालं झाइपिं हनेबहःपि नायःपिनि दथुइ जुइ ।

गुम्ह गुम्हेसिनं थ्व सम्मेलन छाय् याये माल धकाः धयाच्वंपिं नं मदुगु मखु। तर थ्व सम्मेलन यानागुया लिच्वः पिहां वयेवं तिनि इमि म्हुतुप्वाः तीगु जुइफु। आवंनिसें तातुना कथं ज्या जुया वंसा थ्वयेकाच्वनागु नारा कथं नेपालय् जुइ मफइगु ज्या पिने याना क्यने माःगु दु। उकिं हे थ्व ज्या ताःलाकेगु लागि इनाप यानाः नारा थ्वयेकाच्वनागु खः। थ्व ज्या सुथां लाकेगु ज्याय् वर्ल्ड नेवाः अर्गनाइजेसन (WNO) अथवा हलिं नेवाः गुथि व लण्डनया स्थानीय संस्था पासा पुचः गुथि (PPGUK) या मंकाः ग्वसालं जुइत्यंगु खः ।

नाराया मू आज्जु कथं थःथः च्वनागु देशं लण्डन वनेगु धकाः ग्वाकाच्वंगु जुल। थन नेपाः वने नु धकाः धयाच्वंगु मदु। उकिं नेपाः देय् नाप सलंसः दँनिसें स्वापू दयाच्वंगु देय् बेलायतय् हे थ्व मुँज्या जुइगुया थःगु हे बिस्कं महत्व दयाच्वंगु दु ।

उकिं ब्वति काये मन दुपिंसं ग्वसाः खलः WNO व PPGUK या वेब साइटय् दुहां झायाः स्वापू तये फइ अथवा थ्व निगुलिं संस्थाया नायःपिनिगु इमेलपाखें स्वापू तयाः यक्व खँ सीके जिउ। थ्व लसताय् पासापुचः गुथिया ख्वाःपौ 'गुथि' तपंपौयात ल्वःगु नेवाः सम्बन्धि च्वसु, विज्ञापन व आर्थिक हापं बियाः नं थ्व नारा पूवंकेगु कुतः याये जिउ। सुभाय् ।

(च्वमि वर्ल्ड नेवाः अर्गनाइजेशनया नायः खः)

More Stories Like this