सहमति [चिबाखं]

श्याम आशा
"झीपिं थःथः मिलय् जुया वनेमाः" ब्यांचां भचा तापाक्क च्वना सुइगुं मार्फत सर्प व नवचा यात प्रंस्ताव छवयाबिल ।

नवचा नं बिचाःयात" थिक हे जु , थ्व वःगु प्रस्ताबयात सर्पनापं नं सहलह यायेमाः" धकाः छम्ह जन्तुपाखें खँ ल्हाके छवत ।

सर्प नं निम्हसिया खँ न्यनाः थःगु व थःवर्गया हित व सुरक्षाया लागिं प्रस्ताबयात सहर्ष स्विकारयात ।
तर इपिं स्वम्हं नापं च्वने मफइपिं जुल खनीसा ! व खनाः व ग्या व खनाः व ग्या अयनं छलफलला यायेहेमाः, अथे जुया इपिसं माकःया रोहवरय् खँल्हाः बल्हाः न्हयाकल । स्वम्हं नापं मच्वंसें भतिचा ससंकीत जुया ।

दकलय् न्हापां ब्यां नं खँया झवः छुत "जि छिकपिं स्वयाः यक्वः हे कमजोर याकनं ब्वाँय् वने नं मफु । अये नं पारा पारा हाला सर्गं वा वयेकेफु । ल सकसितं माः , लःबिना सुं म्वायेगु कल्पना तक्कं यायेफइमखु । अय नं जि छिकपिं नापं छप्पं जुया च्वनेगु मन दु ।"

सर्प नं ब्यांया खँ न्यना लिसः बिल "जि नं स्वयेबले चिधिकसां मै हुँ " धाइपिंत नं जिगु बिषं खतम यायेफु, अथेसा नं जि छिकपिं नापं स्वापु बल्लाका मिलय् जुया वनेगु खँय् नुगलनिसें इक्षा दु ।"

निम्हसिया खँ न्यने धुंका नवचां थःगु भासं खँ पिल्ह्वल " बिष दुम्हेसित नं जिं स्यायेफु , हालेफुम्हसित नं जिं ख्यायेफु , जिके बः दु , बुध्दि दु , न्ह्याथाय् नं वनेफु जि, न्ह्याथाय् नं सु वनेफु , अथे जुसां जि नं छिकपिं नापं सम्बन्ध सुधार याना वनेगु खँय् जि छपला न्ह्यःने हे दु "
स्वम्हेसियां खँ न्यना छयों ल्हुकु ल्हुकु यना च्वंम्ह माकःया थःगु पाः वल धइगु भापिया नवात "छिकपिं बल्ला !

बुध्दिमानी खः, चलाख नं खः, छिकपिनिगु खँ न्यनेबले छिकपिं थःथःगु घमण्ड व फुर्ति याना च्वनापिं मखुला ? "
"मखु , मखु ! मखु स्वम्हेसिया छप्वाः म्हुतुं सः पिज्वल ।
"अथे खःसा मिलेजुइगु हे बांला । मिले जुसा जंगल नं बांलाइ , छिमि एकआपसय् सम्बन्ध नं क्वातुइ, जंगलय् अमन चैन नं दइ, शान्ति नं दइ मखुला ? माकःनं पालंपाः ख्वाःस्वया धाल ।

इमि बैठकय् इलय् ब्यलय् जुल । जंगलया थासथासय् थःथःगु इलाका, इलाकाय् हिला हिला जुल । बैठक जुक्वःपतिंकं माकःनं न्यनाच्वनी - मिलय् जुल ला ?
स्वम्हेसिया छप्वाः म्हुतुं धैथें लिसः वइ " प्रयत्न जारी दु , सहमतीया लिक्क थ्यने हे त्यंगु दु "। इमिगु सहमती गुबले पुवनी, माकः पियाच्वंम्ह च्वनंतिनी ।

More Stories Like this