सम्पत्ति थत्थें लितबी फैमखु

एकीकृत नेकपा (माओवादी) या न्वकु व वर्तमान प्रधानमन्त्री डा. बाबुराम भट्टराई जनयुद्धया इलय् सामन्त व जमिन्दारतय्गु छेँ बुँ सम्पत्ति आः थत्थें लितवीत पार्टी व राज्य सम्वन्धित निकाययात उजं -निर्देशन) वियादीगु दु । थ्व वयकःया गलत व पार्टीगत प्रक्रिया कथंहे अःखः दु । डा. भट्टराईं सरकार अन्तर्गत खःलाकि पार्टी अन्तर्गत धयागु न्ह्यसःयात विवादय् तक्यंकेत स्वःगु दु । एनेकपा माओवादीयात सरकार प्रमुख प्रधानमन्त्रीं निर्देशन बीफै मखु । प्रधानमन्त्री डा. भट्टराईया थुगु निर्देशनं वयकः सरकार प्रमुख जुयादीथें पार्टीया नं प्रमुख धयागु मनसाय् पिथंगु अहसास जूगु दु । डा. भट्टराई सरकार प्रमुखया हैसियतं मखु, पार्टीया छम्ह जिम्मेवार न्वकुया हेसियतं दकले न्हापां सम्पत्ति लित वीगु खँय् पार्टी दुने छलफल व निर्णय जुइमाः । पार्टीगतरुपं निर्णयहे मजुइकं मयाकं पार्टीगत सम्पत्ति लित व्यु धकाः धायेगु उचित मखु । थ्व ला गैर पार्टीगत खँ जुल । पार्टीं निर्णय यानाः डा. भट्टराईयात प्रधानमन्त्री याःगु खः नकि प्रधानमन्त्रीं पार्टीयात । प्रधानमन्त्री जुइगुतुं पार्टीनापया स्वापू, हैसियत व जिम्मेवारीं मुक्त जुइमखु ।
सामन्त व जमिन्दारतय्गु छेँ बुँ सम्पत्ति लित वीगु धयागु कन्टेनरया ताःचा थें छम्ह निम्हय्सित लित वीमास्ति वल। लित बिल । सम्पत्ति लितवीगुया नं प्रकृया दु, उगु प्रकृयाया खँय् स्पष्ट मयाकं थुकिया नितिं माःगु कानुनी प्रकृयाया व्यवस्थ्ाा मयाकं मात्रै छम्ह निम्ह व्यक्तिया सनकया भरय् लित वीगु ज्या जुइमखु । थ्व खँयात प्रधानमन्त्री भट्टराई छाय् विचाः मयात ? हत्थासं वीगु व प्रधानमन्त्री जुयाः प्रतिपक्षीतय्गु स्यावासी नयेगु लोभय् पार्टी पाखे निर्णयहे मयासे, पार्टी दुने छलफल हे मयासे प्रधानमन्त्री जुइवं थः निर्देशन वीत सक्षम जुल धायेगु व थुइकेगु गलत खः । थुगुकथं प्रधानमन्त्री भट्टराई गलत लपुं न्ह्याः वनाच्वंगु स्पष्ट दु । थुकियात कयाः पार्टीं गम्भीर रुपं विचाः यायेमाःगु अवस्था वये धुंकूगु खँयात थन लोमंके मज्यू ।

प्रधानमन्त्री जुलकि पार्टीयात सरकारी निकाययातथें थुइकाः पार्टीयात निर्देशन वीगु मखु वल्कि पार्टीगत निर्णय याकाः पार्टी सल्लाह व निर्देशनकथं प्रधानमन्त्री डा. भट्टराईं ज्या यायेमाः । ज्या यायेगु परिपाटी दयेकेमाः । देशया प्रधानमन्त्री जुइवंहे पार्टीयात निर्देशन वीगु धयागु पार्टी प्रकृया विपरित खः, पार्टीया अनुशासन विपरित खः । थुकी डा. भट्टराईं सुधार यायेमाः । मखु, थः प्रधानमन्त्री जुइवं फुक्कय्सित निर्देशन वीगु हैसियत थःयात दु धकाः थुइकेगु ज्या यात धाःसा थ्व प्रधानमन्त्री डा. भट्टराईया नितिं जक मखु खुद पार्टीया नितिंहे दुर्भाग्य सावित जुइफु । प्रधानमन्त्री जुइवं डा. बाबुराम भट्टराईयात अमेरिका, भारत लगायत देशतय्सं भिंतुना वियाहल । प्रकृयागत रुपं गलत ढंगं कन्टेनरया ताःचा लःल्हायेवं नेपाली कांग्रेस, एमालें डा. भट्टराइयात सुभाय् विल । थुमिगु भिंतुना व सुभाय् डा. भट्टराईया नितिं तःधंगु खँ जुलसा, पार्टी दुने विवाद व भाँडभैलो मच्चय् जूगु खँ गौण जुल । शान्ति प्रकृया थासय् थ्यंकेत जुयाच्वंगु सेना समायोजन गलत ढंगं न्ह्याः वनाच्वनसा आः वयाः गलत प्रकृयां सामन्त व जमिन्दारतय्गु सम्पत्ति लितवीगु खँ हयाच्वन । थुकिं पार्टी दुने थप समस्या व विवाद हइगु निश्चित खनेदु । पार्टीया निर्णय विपरित ज्याखँ यायेत व याकेत प्रधानमन्त्री डा. भट्टराइयात तत्काल पनेमाःगु दु । थ्व ज्या केन्दि्रय समतिं जक यायेगु सम्भव जुइगुलिं वैठक याकनं च्वनेमाः । प्रधानमन्त्री डा. भट्टराईं अमेरिका भ्रमणं लिहां वयेकाः मखु, तत्काल च्वनेमाः । समस्या व विवादया समाधान यायेमाः ।

More Stories Like this