सभासद्तय्त छेँय् लिहां वयेत इनाप
येँ (झीगु स्वनिगः)
क्वःछिनातःगु इलय् संविधान निर्माण मयात धकाः सुदूपश्चिमाञ्चलया नागरिक समाजं सभासद्तय्त छेँय् लिहां वयेत इनाप याःगु दु । थप याःगु ईया दुने नं संविधान निर्माणया नितिं माःगु ज्या मयाःगुलिं धकाः सभासद्तसे आः तक काःगु तलब भत्ता तकं लितबिइत माग याःगु दु । सुदूरपश्चिमाञ्चल नागरिक समाजं म्हिगः बुधवाः हे बैतडी लागाय् ग्वसाः ग्वःगु जिल्ला स्तरीय नागरिक भेलाय् न्वंवानादीपिं अप्वः यानाः बक्तातय्सं सभासद्तपाखें जनताया जनादेश कथं ज्या मजुल, जनादेशया अवहेलना जुल धकाः आक्रोस प्वंकेगु ज्या तकं याःगु खः।
भेलाय् न्वंवाये झ्वलय् सुदूरपश्चिमाञ्चल नागरिक समाजया कजि पृथ्वीराज अवस्थीं संविधान निर्माणया नितिं नेतातय्त खबरदारी यायेत आः फुक्क नागरिकत छप्पँ छधी जुइमाः धकाः इनाप नं यानादीगु खः । विकास निर्माण लगायतया ज्याय् राजनीतिक दलतातय्गु हे कारणं यानाः पंगः ब्वलंगु दु धकाः न्ह्यथसें तत्काल विकास निर्माणया ज्या न्ह्याकेत तकं इनाप याःगु खः । छगू मेगु हे प्रसङगय कजि अवस्थीं सुदुरपश्चिमयात राज्यं हेपे यानाच्वंगुलिं नागरिक समाज सचेत जुयाः न्ह्याः वनेमाः धकाः बहः बियादीगु खः ।
