मरुया हाथु द्यःयाः ख्वाःपाः कुतुं वल
येँ (झीगु स्वनिगः)
येँयाःया झ्वलय् येँया मरु गणेद्यः देपापाखे सिँयागु प्यंगः थां धंकाः करिव ७ फिट च्वय् तयातःगु हाथु द्यःया मूर्ति ट्याक्सीं ठक्कर नकाः म्हीग मंगलवाः कुतुंवःगु दु । येँयाःया झ्वलय् यंलाथ्व द्वादसी च्यान्हु तक हे दँय् दसं ब्वइगु चलन दु । बहनीसिया थ्यंमथ्यं १० ता इलय् बा १ ज ७६९३ नम्बरया तुयूगु मारुटी ट्याक्सीं थामय् ठक्कर नकेवं अथे हाथु द्यःया ख्वाःपाः कुतुंवःगु खः । हाथुद्यः कथं तेपय् तयातःगु उगु ख्वाःपाः धाःसा छुं नं नोक्सान जूगु मदु तर छगः थां धाःसा स्यंगु दु ।
उगु थां बुधवाः तकया दुने हे ट्याक्सीया मालिकं दयेकेगु सहमति जूगु खः । सहमति कथं दयेकाः हाथु द्यःया ख्वापाः म्हिगः बुधवाः हे थांया च्वय् तयेगु ज्या जूगु दु । अथे ठक्कर नकाः ट्याक्सी नं सामान्य क्षति जूगु दु धाःसा उगु ट्याक्सीयात प्रहरीं नियन्त्रणय् काःगु खः । — प्रमोद खोखाली
