किसानपाखें आन्दोलनया ख्याच्वः

किसान व सुकुम्वासीतपाखें विकल्पया माग

येँ (झीगु स्वनिगः)

प्रधानमन्त्रीया राजनीतिक सल्लाहकार देवेन्द्र पौडेलयात किसान नेतातय्सं विकल्प मदयेकं राज्य सत्तां न्ह्यःनेलाःथे जग्गा लित बिइगु नामय् थःपिन्त भूमिहिन यायेगु ज्या यात धाःसा आन्दोलन यायेगु जुइ धकाः ख्याच्वः बियादीगु दु । म्हिगः बुधवाः एकीकृत नेकपा -माओवादी)या भातृ संगठन अखिल नेपाल किसान महासंघ -क्रान्तिकारी)या केन्द्रीय पदाधिकारीतलिसे सहलह ब्याकेगु झ्वलय् किसान नेतातय्सं अथे प्रधानमन्त्रीया सल्लाहकार पौडेलयात ख्याःच्वः ब्यूगु खः । विशेषयानाः पार्टीया निर्णय छता अले सरकारं मेगु हे कथं घोषणा यानाः गरिव किसान, भूमिहिन किसान, सुकम्वासी, हलिया कमैया, गोठाला थें जाःगु समुदायया मनूतय्त समस्या ब्वलंकेगु ज्या जुल धाःसा थःपिं सुंक्क च्वनेगु जुइमखु धकाः ख्याच्वः बियादीगु खः ।

मंगलवाः जक प्रधानमन्त्रीया सल्लाहकार पौडेलं कब्जाय् कयातःगु फुक्क कथंया सम्पत्ति लित बिइगु धकाः सार्वजनिक रुपं घोषणा यानादीगु समाचार थीथी संचार माध्यमय् वये धुनेवं म्हिगः बुधवाः हे जूगु सहलह ज्याझ्वलय् अथे किसान नेतातय्सं ख्याच्वः बिइवं उगु खँ प्रधानमन्त्री डा. बाबुराम भट्टराईलिसे सहलह ब्याकेगु जुइ धयाः लिहां झायादीगु खः धकाः छम्ह किसान नेतां 'झीगु स्वनिगः न्हिपौ' यात कनादीगु दु । एकीकृत माओवादीया स्थायी समितिया मुँज्यां पारित याःगु प्रस्तावय् 'अझ नं लितबिइ ल्यं दनिगु द्वन्द्वया इलय् कब्जाय् लानाच्वंगु छेँ, जग्गा सम्पतिया हकय् न्हापा हे जूगु सहमतियात कार्यान्वयन यायेत राज्यं तुरुन्त प्रभाविकारी पलाः ल्ह्वनेगु जुइ । भूमिहिन सुकम्वासी, गरिव किसान मोहीतय्सं भोगचलन यानाः वयाच्वंगु जग्गाया हकय् राज्यं इमिगु नितिं बैकल्पीक व्यवस्था यायेगु जुइ । उच्च स्तरीय बैज्ञानिक भूमिसुधार आयोगया प्रतिवेदनया बारे सहमति कायम यानाः तुरुन्त हे कार्यान्वयन यायेगु जुइ ।' धकाः न्ह्यथना तःगु जूसां आः वयाः सरकारं फुक्क कथंया जग्गा सम्पत्ति लित बिइगु जुइ धकाः हःगु खँयात कयाः आपत्ति प्वंकाः अथे किसान नेतातय्सं ब्याच्वः बियादीगु खः । न्हापांनिसें जमिन्दारया बुँइ ज्या यानाः जोताहा अर्थात मोही जुयाच्वना नं छुं नं कथंया आधिकारीक प्रमाणत मदुगु अवस्थाय् जमिन्दारतय्त जग्गा लितबिइगु कथंया सरकारं योजना दयेकल धकाः अथे किसान नेतात आक्रोशित जुयादीगु खः ।

अथे हे भूमिहिन किसान, कमैया, हलिया, गोठाला थें जाःगु समुदायया मनूत च्वनाच्वंगु, जनयुद्ध जुइ न्ह्यःनिसें हे च्वनाच्वंगु थाय्या जग्गा तकं राज्यं लाकाः काइगु अवस्था वल धाःसा बांलाइ मखु धकाः प्रधानमन्त्रीया सल्लाहकार पौडेलयात अथे ख्याच्वः बियादीगु खः ।