जग्गा बीत माओवादी दुने विवाद

थौं सरकार व माओवादी किसान नेता दथुइ वार्ता

येँ (सन्ध्या टाइम्स)/जनयुद्धया इलय् माओवादीं कब्जा यानातःगु जग्गा व छेँ लित बीगु धकाः आः नकतिनि सरकारं याःगु निर्णययात कयाः माओवादीलिसे आवद्ध अखिल नेपाल किसान महासंघ (क्रान्तिकारी) दुने विवाद पिहां वःगु दु ।

सरकारं छेँबुँ लित बीगु धाःसां किसान महासंघया नेता कार्यकर्तातय्सं लित बी मखु धकाः अडान कायेवं संगठन दुने हे थ्व कचवं पिहां वःगु खः। महासंघ दुने छेँबुँ लित बीमाः धाइपिं व लित बीम्वाः धाइपिं निगू पुचः पिहां वःगुलिं थ्व विवाद पिदंगु खः ।

थौंकन्हय् माओवादी दुने अध्यक्ष प्रचण्ड व उपाध्यक्ष मोहन वैद्यया निगू स्पष्ट गुट दुसां किसान महासंघय् धाःसा अध्यक्ष प्रचण्डया पकड दु। आः प्रचण्डं हे समर्थन यानाः गठन जूगु सरकारं छेँबुँ लित बीगु धाःगुलिं किसान महासंघया नेता अध्यक्ष प्रचण्ड खनाः समेत तम्वयाच्वंगु दु ।

किसान महासंघया केन्द्रय् थ्व विषययात कयाः निगू धार पिहां वयाच्वंसां गुलिखे जिल्लाया जिल्ला समितितय्सं धाःसा थःपिंसं हे वक्तव्य समेत पिकयाः छेँबुँ लित बीगु धकाः सरकारं याःगु निर्णयया पालना यायेगु जुइ मखु धकाः सरकारी निर्णययात हाथ्या बिया हयेधुंकूगु दु।
थ्वहे झ्वलय् थौं प्रधानमन्त्रीया राजनीतिक सल्लाहकार देवेन्द्रराज पौडेलं किसान महासंघया ज्याकुथी वनाः किसान नेतातलिसे वार्ता यायेत्यंगु खँ सीदुगु दु। विज्ञ सूत्रं बिउगु जानकारी कथं सल्लाहकार पौडेलं किसान नेतातय् समक्ष थ्व छेँबुँ लित बी हे माली धइगु प्रस्ताव तयादीत्यंगु दु ।

वय्कःया प्रस्तावय् आःयात पार्टीपाखें थःगु नियन्त्रणय् कयातःगु छेँबुँ लित तुं बिया छ्वयेगु, थ्व बाहेक भूमिहिन किसान व सुकुम्बासीतय्सं कब्जाय् कयाः प्रयोग हे यानाच्वने धुंकूगु भूमिया बारे छु यायेगु धइगु बारे छगू आयोग गठन यानाः उकिं बिउगु सुझावया लिधंसाय् ज्या याना वनेगु धइगु खँ दुथ्याः। अज्याःगु आयोगं स्वलाया दुने रिपोर्ट बीगु खँ नं वय्कःया प्रस्तावय् उल्लेख जुयाच्वंगु दु।
तर सल्लाहकार पौडेलं तइगु उगु प्रस्तावयात किसान नेतातय्सं स्वीकार याइगु खः वा मखु धइगु खँ धाःसा सीमदुनि। किसान नेतातय्सं भूमिहिन किसान व सुकुम्बासीतय् बारे सरकारं छुं हे कार्यक्रम महसे न्हापां कब्जा यानातःगु भूमि जक निं लित बीगु निर्णय यात धकाः सरकार व अध्यक्ष प्रचण्ड प्रति समेत आक्रोश प्वंका हयाच्वंगु खँ सीदुगु दु ।