एक मिनेट हे पदय् च्वने मखु: प्रम भट्टराई
येँ (सन्ध्या टाइम्स)/प्रधानमन्त्री डा. बाबुराम भट्टराईनं छुं दिंया दुने हे यदि शान्ति प्रक्रिया व संविधान निर्माणय् छुं हे उल्लेख्य प्रगति मजुल धाःसा थः एक मिनेट नं पदय् च्वने मखु धयादीगु दु। वय्कलं धयादिल, 'यदि उल्लेख्य प्रगति मजुल धाःसा पदय् च्वनेगु जिगु मनसाय मदु ।'
थः संयुक्त राष्ट्रसंघया महासभाय् ब्वति कायेत अमेरिका वने न्ह्यः हे शान्ति प्रक्रियाय् महत्वपूर्ण प्रगति जुइगु दावी नं वय्कलं यानादिल। प्रधानमन्त्री भट्टराई वइगु असोज २ गते राष्ट्रसंघीय महासभाय् ब्वति कायेगु झ्वलय् न्यूयोर्कय् वनीगु ज्याझ्वः दु ।
प्रधानमन्त्रीया सरकारी निवास बालुवाटारय् थौं सुथय् संचारकर्मीतलिसे खँल्हायेगु झ्वलय् प्रधानमन्त्री भट्टराईनं थ्व खँ धयादीगु खः। वय्कलं दलतय् दथुइ शान्ति प्रक्रिया पूवंकेगु निंतिं अनौपचारिक रुपं जुयाच्वंगु वार्ता याकनं हे सकारात्मक लिच्वःपाखे वनी धकाः विश्वास नं यानादिल। माओवादी सेनाया लडाकुतय्गु समायोजन बारे ठोस सहमति जुइ धुंकाः थःगु अनुपस्थितिइ नं ज्या मदीगु खँ कनादिल ।
भारतलिसे सुपुर्दगी सन्धी जुइगु धइगु चर्चा हानं पिहां वःगु दु नि धकाः पत्रकारतय्सं न्यंगु न्ह्यसःयात कयाः प्रम भट्टराईनं धयादिल, 'भारतलिसे छुं नं कथंया राष्ट्र विरोधी सम्झौता यायेगु ज्या जिपाखें जुइ मखु। बरु जि थः हे समाप्त जुया वने, अज्याःगु ज्या जिं सुंलिसे नं याये मखु।' अमेरिका लिपा वय्कः भारत झाइ ।
