धाः ब्वज्याया तयारी
उदाय् समाजया ग्वसालय् वइगु भाद्र ३१ गते (यंलागाः पंचमी) शनिवाः कुन्हु येँया बसन्तपुली 'गुंला बाजं ब्वज्या' जुइत्यंगु दु। उगु ब्वज्या ताःलाकेगु निंतिं उदाय समाजया थःगु छेँय् म्हिगः छगू पत्रकार सम्मेलन जुल। समाजया नायः डा. रुपज्योति कंसाकारं उदाय समाजया म्हसीका व समाजया सुधारात्मक ज्याया विषयय् पत्रकारतय्त जानकारी बियादिल ।
महासचिव रत्नकाजी तुलाधरं गुंला बाजंया महत्व व थुगु ब्वज्याया उद्देश्य बारे जानकारी बियादिल। नेवाः समाजय् तसकं लोकह्वाःगु गुंलाबाजं (धाः बाजं) संरक्षण यायेगु, गुंला बाजंत दक्व एकत्रित यायेगु व विश्वन्यंकं प्रचार-प्रसार यायेगु हे थुगु ब्वज्याया मू आज्जु दुगु खँ वय्कलं कनादिल ।
गुंलाबलय् जक थाइगु थ्व बाजंया विशेषता खःसा सुमधुर धुन नापं न्यासि वँवं थाइगु चाल व छथासं च्वनाः थाइगु ग्वारा थुकिया ताल खः। ग्वाराया दुने नं न्हय्गू थीथी ताल दु। धाःया नापनापं नाय्खिं, दंगः, ताः, भुस्याः, छुस्याः नं थाइ। म्वाहालि, बाँसुरी, पँय्ताः, दंगः, दाफा, नाय्खिं थुकिया सहायक बाजं खःसा थौंकन्हय् म्वाहालि धाःसा लोप हे जुइधुंकूगु दु ।
थौंकन्हय् ट्रम्पेट, भ्वाइलिन, गीतार लगायतया संगीत फ्यूजन यानाः न्हूगु पुस्तायात नं धाःपाखे आकर्षित यानाहःगु दु। ब्वज्याय् उकथंया फ्युजन प्रस्तुती नं जुइ। लिसें विश्वय् हे दकलय् न्हापां सछिगः धाः छक्वलं थाइगु नं ग्वसाः दु। धाः थाइपिं जक २५० म्ह तयारी जुयाच्वंगु दु। ७ निसें ७० दँ तकयापिंसं ब्वति काइगु व उकी मिसापिनि नं सहभागिता दइगु खँ ग्वसाः खलकं कंगु दु ।
