शिशु स्याहार केन्द्रपाखें कञ्चनपुर बन्द
येँ (सन्ध्या टाइम्स)/बन्द व चक्काजाम आः गुलि दंगु कार्यक्रम जुइधुंकल धायेबलय् त्वाः त्वालय् चायेका तःगु शिशु स्याहार केन्द्रय् ज्या याइपिं कर्मचारीतय्सं तकं थःपिनि तलब अप्वयेके माल धकाः सतक जाम याइगु जुया वःगु दु ।
कञ्चनपुरया थीथी शिशु स्याहार केन्द्रय् ज्या याइपिं मिसा कर्मचारीतय्सं थीथी माग यासें थौं कञ्चनपुर बन्द याःगु खः। बन्द यायेत सतकय् कुहां वःपिं स्वम्ह कार्यकतातय्त प्रहरीं ज्वंगु दु। बाल बिकास केन्द्र संघर्ष समितिया अध्यक्ष गंगा रावत, सचिव कृष्णा जोशी व दुजः पिंकी जोशीयात प्रहरीं ज्वंगु खः। उमिसं बन्द आह्वान याःगुलिं थौं सुथंनिसें कञ्चनपुरया यातायात व शिक्षण संस्था नं बन्द जुयाच्वंगु दु ।
थःपिनि नेतात ज्वनेवं बाल विकास केन्द्र नाप आबद्ध शिशु स्याहार केन्द्रया शिक्षकत नं सतकय् कुहां वयाः महेन्द्र नगरया बजारय् च्वंगु भानुभोकय् प्रदर्शन याःगु दु। शिशु स्याहार केन्द्रया शिक्षकतय्त तलब अप्वयेकेमाःगु माग यासें बाल विकास केन्द्रं थ्व बन्दया आह्वान याःगु खः ।
