चतुर्वेदीयात छुट

येँ (सन्ध्या टाइम्स)/भ्रष्टाचार द्वपनय् दत्या कैद व बंया फैसला न्यंकूम्ह नेपाल वायुसेवा निगमया पुलांम्ह अध्यक्ष रामाज्ञ प्रसाद चतुर्वेदीयात थौं सर्वोच्च अदालतं २० प्रतिशत कैद व बं छुट याना बिउगु दु। मुलुकी ऐनया दण्ड सजाय महलया ४१ (क) य् फैसला जूगु मितिं ६० न्हु दुने अभियुक्त अदालतय् हाजिर जुल धाःसा सजायया २० प्रतिशत छुट जुइगु व्यवस्था दु। छुटया लागिं चतुर्वेदी निवेदन नं तःगु खः। वय्कःयात कानुनी प्रक्रिया पूवंकाः थौं हे जेल चलान याइगु सम्भावना दु। आयल निगमया नं पुलांम्ह महाप्रवन्धक चतुर्वेदीं भष्टाचार याःगु ठहर यासें दत्या कैद व १ करोड २४ लाख तका बिगो पुइकेगु व उलि हे बं नं पुलेमाःगु फैसला सर्वोच्च अदालतं याःगु खः। सर्वोच्चया फैसला कथं चतुर्वेदीं आः २ करोड ४८ लाख पुले मालीगु अवस्था दु ।