विश्वविद्यालयय् आः ऐन कथं नियुक्ति

पूर्ववर्ती सरकारं थीथी विश्वविद्यालयया कुलपति नियुक्ति यायेगु ज्याय् पिहां वःगु विवादयात आःया सरकारं समाधान याःगु दु। पार्टीतय् दथुइ भागबन्डा मिले यायेत सीट ल्याः कथं विश्वविद्यालयया भीसी नियुक्ति यायेगु उगु ज्यायात माओवादी व कांग्रेसं विरोध यानाच्वंगु खःसा उकिं यानाः छुं नं विश्वविद्यालय संचालन तकं याये मफुगु खः। तर आः मोहनि नखः नं न्ह्यःने थ्यंकः व भीसी मदयाः कर्मचारीतय्सं तलब तकं काये मखनीगु अवस्था वःगुलिं पुलांगु नियक्तियात कायम हे यायेगु व आवंलि मेगु नियक्ति यायेबलय् सहलह ब्याकेगु धकाः सहमति कायम याःगु खः। थ्व स्वयां नं महत्वपूर्ण खँ धइगु आवंलि छुं नं विश्वविद्यालयया भीसी नियुक्ति यायेबलय् राजनीतिक भागबन्डाया लिधंसाय् मखुसें क्षमता व दक्षताया लिधंसाय् नियुक्ति यायेगु व उकिया लागिं माःगु ऐन समेत दयेकेगु धकाः नं खँ जूगु दु। छुं नं निकायय् सुयातं नियुक्ति यायेबलय् थः सतीपिं, पार्टीया मनू आदि आदियात नियुक्त यायेबलय् उकिं पूरा शैक्षिक वातावरण हे राजनीतिकरण जूवनीगु कारणं ऐन हे दयेकाः वहे कथं नियुक्तिया प्रक्रिया न्ह्याकेबलय् विवाद पिहां वइगु सम्भावना म्हो जक दइ। खतुं ऐन दयेकेबलय् अज्याःगु ज्या याइपिंत पनेगु छुं भचा ज्या ला जू वनी, तर नियत बांलाः मजुल धाःसा न्ह्यागु हे ऐन दयेकूसां नं उकियात छले यानाः पिहां वनेगु लँपु धाःसा चूलाना हे च्वनी। ऐन दयेकेगु जक महत्वपूर्ण खँ मखु, उगु ऐनयात लागू यायेगु व छुं जुयाः पालना मजुल धाःसा मयाःम्हेसित कारवाही यायेगु आँट तकं राज्यं याये फयेकेमाः। आँट मदुसा ऐन दुसां लागू जुइ मखु ।

More Stories Like this