कायपिनि जंक्व स्वयाः वन छलमाया शाक्य

कृष्ण

गुम्हं गुम्हं मनूत जिवंकाछि हे ल्वय् मदयेक नं म्वाइगु जुयाच्वन। गथे कि ख्वपया १०२ दँया बैंसय् मदुम्ह मय्जु छलमाया शाक्य। मदये न्ह्यः तक नं वय्कः दनाः इरुथिरु जुइगु व इताः कायेगु ज्या बांलाक हे यानाच्वंगु जुयाच्वन। वय्कः मिखाया अप्रेशन यायेत छक्वः बाहेक वय्कः थःगु जिन्दगीइ केवल छक्वः हे जक अस्पताल भर्ना जुयादीगु दु। व नं पिशाब रोके जुयाः बेहोस हे जुसेंलि तिनि ।

विक्रम संवत १९६८ माघ १ गते भ्वँतय् जन्म जूम्ह छलमाया शाक्य झिंखुदँ दुबलय् ख्वप ४ वडाया हिरामान शाक्यनाप इहिपाः यानाः झाःम्ह खः। वय्कःया जहान धाःसा थनिं स्वीनिदँ न्ह्यः २०३६ सालपाखे हे मंत। तर जहान मदुसां कायपिनि बल्लाःगु तिबः दयाः वय्कः गबलें नं निराश व हतास जुयामदी। वय्कःया तःधीम्ह काय तीर्थराज शाक्य हे थौंकन्हय् चय्निदँ दयेधुंकल। चय्दँ दुम्ह दातिम्ह काय विक्रमराज शाक्य व न्हय्च्यादँ दुम्ह साहिलाम्ह काय हिरण्यराज शाक्य स्वम्हं ज्याजंक्व हे क्वचाये धुंकूपिं खःसां उपिं नं मांम्ह थें हे धुकुमकु धाःनि। कायपिं जक मखु जिथि जुइधुंकूपिं भौपिं तकं उतिकं बल्लाःनि ।

थनिं निदँ न्ह्यः ख्वपय् छलमाया शाक्यया प्यक्वःगु ज्याःजंक्व याःगु खः। तसकं दुर्लभ मनूतय्सं जक याये खनीगु उगु ज्याःजंक्व लिपा छलमाया ख्वपया छम्ह 'सेलिब्रिटी' थें जूवंगु खः। ख्वपय् वय्कःयात म्हमसिउ धइपिं हे सुं मंत। थःगु प्यक्वःगु जंक्व जक मखु, कायपिनिगु जंक्व तकं स्वयेखंम्ह वय्कः धाथें भाग्यमानी नं धायेमाः। वय्कः थथे जिवंकाछि हे निरोगी जुयाः म्वायेफुगुया मू कारण न्हापांनिसें हे भ्वँतय् थःछेँ थ्यंक न्यासि हे जुया जुइगुलिं नं खयेमाः ।

पिने बहालय् सुं मनू वःसा न्ह्यसु लंकाः ख्याः यानाः न्ववायेगु बानी दुम्ह छलमाया शाक्य १०२ दँय् क्यंसां छप्ति हे धुसि मलू। सुं वयाः ल्हाः ज्वना बिउसा 'म्वाः म्वाः जि थःहे न्यासि वनेफु' धकाः धिकिधिकिं न्यासि वनी। अन्तिमय् आकाझाकां धइथें पिशाब रोके जुयाः वय्कः मंत, लत्या न्ह्यः। उमेरं १०२ दँ क्यंसां वय्कः उलि याकनं वनी ख्वाः मवःगु खँ जःलाखःलां कनेगु याः। वय्कः मदयेधुंकाः ख्वपया छम्ह 'नमूना सेलिब्रिटी' हे मदुगु थेंज्याःगु अनुभव म्हसिउपिंत जुयाच्वंगु दु ।

More Stories Like this