माओवादीया लचकताय् प्रतिपक्षया षडयन्त्र

सरकारया नेतृत्व एकीकृत नेकपा (माओवादी)या न्वकु डा. बाबुराम भट्टराईया ल्हातय् वयेवं प्रतिपक्षय् च्वंवंपिं संसदीय दलया प्रमुख दलत नेपाली कांग्रेस व एमालें मेगु षडयन्त्रय् यानाच्वंगु संकेट वःगु दु । प्रधानमन्त्री डा. भट्टराईं घोविघाटया समझदारीयात ध्याक्वय् वांछ्वयाः पार्टीया नायः नाप मिलय् जुयाः विना आधार व विना कार्य योजना हत्थासं ल्वाभः तयातःगु ताःचा लःल्हाना वीवं माओवादी पार्टी दुने गम्भीर अवस्था सृजना जुइवं समस्या समाधानया नितिं केन्दि्रय समितिया वैठक च्वने त्यंगु खः । वइगु १ गते च्वने धयातःगु केन्दि्रय समितिया वैठक प्रधानमन्त्री डा. भट्टराईया अमेरिका भ्रमणय् वनेमाःगुलिं केन्दि्रय समितिया वैठक हानं लिछ्याःगु खः । बहुमतीय सरकारय् नेतृत्व यानाच्वंम्ह प्रधानमन्त्री डा. भट्टराईं सेना समायोजनया नामय् स्थायी समिति वा केन्दि्रय समितिया निर्णयया अखः कन्टेनरया ताःचा लःल्हानाः पार्टी प्रकृया विरुद्ध वनेगु संस्कार पार्टीं ज्वनेवं संस्थापन पक्ष व सरकारी पक्ष संकटय् लाःवंगु दु । हत्थासं ताःचा लःल्हानाः प्रतिपक्षय् च्वनाच्वंपिं कांग्रेस व एमालेयात विश्वासय् कयाः लय्तायेकेगु ज्या याःगु खः । थुकिया ल्यूने वहुमतीय सरकारयात सहमतिया रुप वीगु उदेश्यं ज्या जूगु नं थन लोमंके मज्यू । अर्थात नेपाली कांग्रेस व एमालेयात सरकारय् सहभागी याकेगु प्रधानमन्त्री डा. भट्टराईया सोच खः । तर प्रतिपक्षय् च्वनाः प्रतिगामी हरवत यायेगुली खप्पिस कांग्रेस व एमालें प्रधानमन्त्री डा. भट्टराइया थुगु कुतःयात नं असफल यायेत स्वयाच्वंगु स्पष्ट दु ।

नेपाली कांग्रेस व एमाले वर्तमान राजनीतिक ख्यलय् विचार सून्य व सिद्धान्तं च्यूत पार्टीया रुपय् रुपान्तरित जुयावनेवं माओवादीया संस्थापन पक्ष व सरकारया नेतृत्व यानाच्वंम्ह प्रधानमन्त्री भट्टराइया हत्थासं न्ह्याकाच्वंगु सेना समायोजन व संविधान निर्माणया प्रकृया नं दथुइहे तक्यनीगु खनेदु । जनसेनाया १९ द्वः संख्यायात वच्छिहे समायोजन मयासें, स्वद्वः प्यद्वः जक समायोजन यायेगु मनस्थिति सार्वजनिक याना वयाच्वंगु दु । एमाले नेपाली कांग्रेसया हाहालय् लगय् जुयाः कांग्रेसया भाईया भूमिका म्हिताः वदनामी कमय् यायेगुली व्यस्त दु । उखे नेपाली कांग्रेसं धाःसा वंगु निवाःया दुनेया निम्ह कांग्रेसी नेतां स्वंगू प्रस्ताव न्ह्यःने हयाः समायोजनया संख्यायात थप विवादास्पष्ट यानाव्यूगु जक मखु, नेपाली कांग्रेस समायोजन याये चाहे मजू धयागु खँयात प्रष्ट यायेगु ज्या जुयाच्वंगु दु ।

वंगु निवाः न्ह्यः नेपाली कांग्रेसया उपसभापति व संसदीय दलया नेता रामचन्द्र पौडेलं जनसेनाय् न्याद्वःयात सेना समायोजन यायेफैगु धाःगु खः । थुकिया छुं न्हि लिपा, कांग्रेसया सभापति सुशिल काइरालां प्यद्वः जक समायोजन यायेफैगु खँ सार्वजनिक यात । थुकिया छवाः दुनेहे सभापति कोइरालां हानं थःगु प्यद्वः मखु, स्वद्वः जक सेनाय् समायोजन यायेगु धयाः नेपाली कांग्रेस सेना समायोजनया पक्षय् मदु, मात्रै समस्या व विवाद थनाः यथार्थय् अलमलय् यायेगुली व्यस्त दु ।
सेना समायोजन व संविधान निर्माण खँ नाप नापं वनेमाःगुली प्रतिपक्षय् च्वनाच्वंपिं नेपाली कांग्रेस व एमालें संविधान दयेकेगु खँहे पितहयाच्वंगु मदु । आः वयाः सेना समायोजनय् नं अलमलय् यायेगु खँ जक हयाः थुपिं अग्रगमनया लँपुं न्ह्याः वनेत तयार मदु धयागु सन्देश व्यूगु दु । माओवादीया लचकतायात गलतरुपं थुइकावःगु दु । प्रतिगमनया पक्षय् अले अग्रगमनया विरुद्ध षडयन्त्र यायां अन्तत कांग्रेस एमाले गन थ्यनीगु खः धाये फैगु अवस्था मदु ।

More Stories Like this