तोखाय् चच्छि हे ल्वापु, प्रहरीपाखें हवाई फायर

तोखा (झीगु स्वनिगः)

येँ जिल्लाया उत्तरपाखे लाःगु नेवाःतय्गु ऐतिहासिक नापं सांस्कृतिक रुपं तसकं महत्वपूर्णगु बस्ती तोखाय् सोमवाः बहनीनिसें मंगलवाः सुथय् तक हे ल्वापु जुल । ल्वापुया झ्वलय् प्रहरीं हवाई फायर तकं याःगु खः । घटना विवरण कथं स्थानीय विजय श्रेष्ठ, केदार श्रेष्ठ, बुद्ध श्रेष्ठ व निलकृष्ण श्रेष्ठयात आकाझाकां आक्रमण यायेगु ज्या सोमवाः थ्यंमथ्यं बहनी माइक्रोव पार्कय् खुकुरीं पालाः ब्यूगु खः । अथे आक्रमण लिपाः आक्रमण याःपिं धाःपिं मध्ये अनया राम श्रेष्ठया छेँय् स्थानीय मनूतय्सं घेराउ यायेगु ज्या जुल ।

अबले हे श्रेष्ठया छेँय् नं अप्पां तकं कयेकाः हयेगु ज्या यात । प्रहरीत थ्यंकः वल । प्रहरीं तत्काल इमित ज्वनेगु ज्या मजूगुलिं ज्वनाः कारवाही यायेमाः धकाः स्थानीय मनूतय्सं दबाव बिइगु ज्या जुल । अले लिपा प्रहरीं खापा हे तछ्यानाः दुहां वन । आक्रमण याःपिं धाःपिं राम श्रेष्ठ, सुमन महर्जन व शिलभर डंगोलयात ज्वन । अबले तकया दुने प्रहरी व स्थानीय मनूतय्गु दथुइ ल्वापु सुरु जुल । उगु इलय् आक्रोशय् वःपिं स्थानीय मनूतय्सं राम श्रेष्ठया छेँय् च्वंगु निगः मोटरसाईलक पिने हयाः च्याकेगु यात । अथे हे श्रेष्ठया अबु नारायण प्रसाद श्रेष्ठ छगः गाडि तकं बांमलाक्क तोडफोड यायेगु ज्या जुल । उगु ई तकया दुने चान्हय् जुइ धुंकूगु । तःक्वःमछि प्रहरी फोर्स थपे यायेगु ज्या जुल । उगु हे इलय् प्रहरीत लँ मसिया अलमल जुल । प्रहरी व स्थानीय मनूतय् दथुइ बांमलाक्क हे ल्वापु जुल । ल्वापु सुथय् पौने ३ बजेतक जूगु खः ।

ल्वापुया झ्वलय् प्रहरीं दर्जनौ अश्रुग्याँसं कयेकेगु नाप नापं फाइरिङ तकं याःगु खः । उगु ल्वापुइ लानाः मेमेपिं नं मनूत नापं यानाः छगू दर्जनं मल्याक घाःपाः जूगु खः । घाःपाः जूपिन्त चान्हय् हे तिचिङ अस्पतालय् यंकेगु ज्या जूगु खः । तोखाय् छगू कथं चच्छि हे ल्वापु जुल । थ्व हे झ्वलय् घाःपाः जूपिनिगु परिवारपाखें आक्रमणकारीतय्त कडा कारवाही यायेमाः धकाः म्हिगः मंगलवाः सुथय् महाराजगन्जया प्रहरी चौकीइ वनाः पौ बिइगु तकं ज्या जूगु खः । अथे चच्छि हे ल्वापु जूगुलिं तोखाया यक्व हे मनूत उखुन्हु द्यने तकं मखन ।