कांग्रेसं अर्थहिन याःगु उपसमिति

येँ (झीगु स्वनिगः)

नेपाली कांग्रेसं शान्ति प्रक्रिया पूरा मजुइकं न्हूगु संविधानया निर्माण यायेगु ज्या छुं नं न्ह्याकेगु जुइमखु धकाः अडान काःगुलिं न्हूगु संविधानया नितिं विवाद जुयाच्वंगु ज्यंकेत धकाः दयेकातःगु संविधानसभाया संवैधानिक समिति अन्तर्गतया उपसमिति अर्थहिन जूगु दु । म्हिगः मंगलवाः नं उपसमितिया मुँज्याच्वंगु खःसा उगु इलय् नं कांग्रेसया नेता रामचन्द्र पौडेलं अडान कायेवं मुँज्या हे अर्थहिन जुयाब्यूगु दु ।

उगु मुँज्याय् उपसमितिया कजि नापं एकीकृत माओवादीया नायः पुष्पकमल दाहाल प्रचण्डं अथे हे खःसा उपसमितिया विघटन याःसां जिल धकाः तकं प्रस्ताव तयादीगु खः धकाः उगु मुँज्याय् ब्वति कयादीम्ह छम्ह नेतां धयादीगु दु । उपसमितिइ सहमति मजुयाच्वंगुलिं न्हूगु संविधानया एकीकृत मस्यौदा तयार यायेगु भाला बियातःगु संवैधानिक समितिया मुँज्या तकं च्वने फयाच्वंगु मदु ।