द्वन्द्वकालया मुद्दा लितकायेगु : महान्याधिवक्ता

येँ (झीगु स्वनिगः)

महान्यायाधिवक्ता मुक्ति प्रधानं सशस्त्र द्वन्द्वया इलय् माओवादीया नेतातय्त लगेयाःगु फुक्क मुद्दा लितकायेगु जुइ धकाः धयादीगु दु । २०४६ सालंनिसें हे राजनीतिक प्रकृतिया मुद्दा लित कायेगु ज्या जूगु खँ न्ह्यथसें वय्कलं राजनीतिक मुद्दा लितकायेगु ज्या मजूगु जूसा एमालेया नेतात माधवकुमार नेपाल, केपी शर्मा ओली, झलनाथ खनाल फुक्कसिनं ज्यानमार्ने उद्योगय् २० दँ जेल सजाय नयेमालीगु खः धकाः नं स्पष्ट यानादिल ।

रिपोर्टर्स क्लब नेपालं म्हिगः मंगलवाः याःगु साक्षात्कार ज्याझ्वलय् महान्याधिवक्ता प्रधानं अथे धयादीगु खः । वय्कलं धयादिल 'शासन ब्यवस्था विरुद्ध ल्वायेगु झ्वलय् लगेजूगु मुद्दा धैगु राजनीतिक मुद्धा खः । राजनीतिक प्रतिशोधया आधारय् तःगु मुद्दा लित कायेवं आपत्ति प्वंकेमाःगु मदु ।' सर्वोच्च अदालतं सर्वश्वसहित जन्मकैदया सजाय न्यंकूम्ह माओवादीया सभासद् बालकृष्ण ढुंगेलयात नं द्वन्द्वकालय् हे मुद्दा तःगुलिं उगु मुद्दा नं लित कायेगु जुइ धयादिल ।

महान्याधिवक्ता मुक्ति प्रधानं धयादिल 'बालकृष्ण ढुंगेलयात जेलय् तये न्ह्यः द्वन्द्वकालय् माओवादीपाखे सीपिं १३ हजारया जिम्मा राज्य पक्षं कायेमाः । ढुंगेलयात जनयुद्धया इलय् हे ओखलढुंगाया इन्चार्ज जूगु सइलय् उगु द्वपं ब्यूगुलिं व राजनीतिक प्रकृतिया खः धैगु स्पष्ट जू । उकिं वय्कःया मुद्दा लित कायेगु जुइ । लित कायेमदु धकाः धाये दैमखु ।' राजनीतिक ख्वाःपाः पुयातःगु गम्भीर कथंया मुद्दा धाःसा लित काये जिउ धयादिसें वय्कलं मुद्दाया झ्वलय् राजनीतिक बाय् ब्यक्तिगत खः ला कि मखु धकाः जिल्ला अदालतं स्वयेगु याइ धयादिसें राजनीतिक मुद्दाया नामय् मेेमेगु अपराधया अपराधीत उन्मुक्ति जुइगु खँय् सुनां नं चिन्ता कायेमाःगु मदु धकाः नं स्पष्ट यानादिल । भारतया पटनाय् च्वंगु उच्च अदालतं माओवादीया १२ म्ह नेता व कार्यकर्तातय्त न्यंकूगु सजाायया विषययात कयाः फैसला अध्ययन यायेगु ज्या जुयाच्वंगु नापं अध्ययन धुंकाः जक सरकार निचोडय् थ्यनी धयादिसें माःगु कथं गृहकार्य यानाः माःगु प्रक्रिया न्ह्याकेगु जुइ धकाः नं वय्कलं जानकारी बियादिल । प्रधानं सत्य निरुपण आयोग गठन यानाः राजीतिक प्रकृतिया मुद्दाया विषययात टुंगेयायेगु बांलाइ धयादिसें सत्य निरुपण आयोग गठन लिपा सर्वोच्च अदालतं अन्तिम फैसला याःगु मुद्दाया विषयसं सुरुंनिसें हे छानविन यायेगु जानकारी नं बियादिल ।