तोखाय् चान्हय् हवाई फायर

खुकुरीं पालाः प्यम्ह घाःपाः, मोटरसाईकल व गाडी तोडफोड

तोखा (सन्ध्या टाइम्स)/वंगु चान्हय् चछि हे धइथें तोखाया गणेश स्थानय् स्थानीयबासी व प्रहरी दथुइ तसकं ल्वापु जुयाः तोखा छगुलिं युद्धभूमि थें जुयाच्वंगु दु। म्हिगः बहनी ८ बजेपाखे शुरु जूगु उगु घटनां थौं सुथय् तकं चर्को रुप कयाच्वंगु दनि। विजय श्रेष्ठ नांया छम्ह स्थानीय ल्याय्म्हयात राम श्रेष्ठ लगायतया मनूत जानाः तरवारं पालाः घाःपाः यानाबीवं शुरु जूगु ल्वापु तच्वयाः तोखा लागा युद्धक्षेत्रय् परिणत जूवंगु खः ।

बहनी अथेहे ८ बजेपाखे अन येँयाः जात्रा जुयाच्वंगु इलय् हे पुलांगु रिसइबीयात कयाः राम श्रेष्ठं विजय श्रेष्ठयात तरवारं पाःगु खयेमाः धकाः अनुमान याःगु दु। राम श्रेष्ठ, सिल्भर डंगोल, सुमन महर्जन लगायतया पुचलं स्थानीय ल्याय्म्हत विजय श्रेष्ठ नापं केदार श्रेष्ठ, निलकृष्ण श्रेष्ठ, बुद्ध श्रेष्ठ व करण श्रेष्ठपिंत सांघातिक हमला यायेवं स्थानीय मनूतय्सं नारायण श्रेष्ठया छेँयात हे घेराऊ बियाः तरवारं पाःम्ह वया काय राम श्रेष्ठयात प्रहरीइ लः ल्हायेमाःगु माग याःगु खः ।

तर अःखः अन प्रहरी थ्यंकः वये धुंकाः नं वयात ज्वनेगु पलेसा प्रहरीत नं नारायण (अबुम्ह) व राम (काय्म्ह) या पँलिनाः वयात संरक्षण यात धकाः स्थानीय मनूतय्सं विरोध यायेवं प्रहरीलिसे ल्वापु जूगु खः। थ्वया दथुइ राम श्रेष्ठया छेँया कःसिं अप्पां कयेका हःगुलिं मनूत घाःपाः नं जूगु खः। अनंलिपा ल्वापु तच्वयावनाः श्रेष्ठया छेँय् च्वंगु निगः मोटरसाइकल च्याकाः बिउगु खःसा नारायणया पाजेरोयात नं तोडफोड याःगु खः। अन वःपिं प्रहरीं लँ म्हमसियेवं उपिं बुं बुं जुनाः बिसिउँ जुइमाःगु खः ।

प्रत्यक्षदर्शीतय् कथं आक्रोशित स्थानीय ल्याय्म्हतय्सं कयेकूगु अप्पां लानाः अन न्हापलाक थ्यंकःवःगु पुचःयापिं दर्जनौं प्रहरीत नं घाःपाः जूगु दु । थप खुगः भ्यानय् वःपिं प्रहरीं अन भीड नियन्त्रणया लागिं हवाई फायर याःगु खःसा दर्जनौं सेल अश्रुग्याँस त्वःतूगु खः। लिपा सशस्त्र प्रहरी नापं च्यागः गाडी हयाः तिनि न्हापायापिं प्रहरीतय्त सुरक्षित रुपं लित ब्वना यंकेफुगु खः ।

ल्वापु तच्वयेवं म्हिगः जुइमाःगु स्थानीय जात्रा नं स्थगित जूगु दु। नापं घाःपाः जूम्ह विजययात आः टिचिङ्ग अस्पतालय् वासः याकातःगु दु। छ्यनय् व ल्हातय् तच्वकं घाःपाः जूम्ह विजयया अप्रेशन सफल मजूनिगु खँ अस्पताल सुत्रं धाःगु दु। सुथय् ३ बजे तकं टोखाय् प्रहरी व स्थानीय जनता दथुइ लितुमतु लिनाः ल्वापु जुयाच्वंगु खः।
थौं महाराजगञ्ज प्रहरी चौकीइ कुनातःपिं नारायण श्रेष्ठ व राम श्रेष्ठपिंत आवश्यक कारवाहीया लागिं स्थानीय जनतां चौकी घेराउ यानाः मागपत्र बीगु जूगु दु। थौं सुथंनिसें हे तोखाय् वनीगु रुटया छगः हे गाडी चले जुयाच्वंगु मदु। घटना लिपा थौं तोखा देय् हे सुनसान जुयाच्वंगु दु ।