संयोजक प्रचण्डपाखें उपसमिति विघटनया प्रस्ताव
येँ (सन्ध्या टाइम्स)/ सविधानसभाया संवैधानिक समिति अन्तर्गत न्हूगु संविधानया नितिं विवादित विषय ज्यंकेत एकीकृत माओवादीया अध्यक्ष प्रचण्डया नेतृत्वय् दयेकाः ताः ई न्ह्यवंनिसें सहमति ब्वलंके मफयाच्वंगुलिं संयोजक प्रचण्डं हे उपसमितियात भंग यायेगु प्रस्ताव तयादीगु दु ।
थौं च्वंगु उपसमितिया बैठकय् प्रचण्डं उगु प्रस्ताव तयादीगु खः। उपसमितिया बैठकय् नेपाली कांग्रेसया नेता रामचन्द्र पौडेल न्हापालाक शान्ति प्रक्रिया निं पूवंकेमाःगु अनं लिपा तिनि न्हूगु संविधानया बारे सहलह यायेफइ धकाः अडान तयाः छुं ई लिपा हे पिहांवंगु खः। अथे विवादयात ज्यंके मफइगु अवस्थाय् उपसमितिया अर्थ मदुगु खँ न्ह्यथँसें प्रचण्डं विघटनया प्रस्ताव तयादीगु खः। थौं च्वंगु उगु बैठकं नं छुं हे खँ क्वःछिइ मफुत। उपसमितिं आः तक याये धुंकूगु ज्याया बारे सहलह जक जूगु दु धकाः छम्ह नेतां धयादीगु दु ।
उपसमितिया बैठक जुयाच्वंगु इलय् ततःधंगु दलया नेतातय्सं यानाः हे न्हूगु संविधान निर्माण मजुयाच्वंगु खः धकाः स्वतन्त्र सांसद बबनसिंह बैठक जुयाः च्वंतले हे बैठक क्वथां पिने लुखाय् धर्ना च्वनादीगु खः। बैठकय् चिचीधंगु दलया नेतातय्सं मंसीर १४ गतेयात ध्यानय् तयाः संविधान निर्माणया ज्यायात तीव्र गतिं न्ह्याकेत सुझाब बियादीगु खः। उपसमितिं विवाद ज्यंके मफयाच्वंगुलिं संविधानया एकीकृत मस्यौदा दयेकेगु भाला बियातःगु संवैधानिक समितिया बैठक ताः ई न्ह्यवंनिसें च्वने फयाच्वंगु मदु ।
