धूम्रपान निषेध ऐन ज्या मवल
येँ (सन्ध्या टाइम्स)/सार्वजनिक थासय् धुम्रपान याइपिंत कारवाही यायेगु धकाः सरकारं हल्लाखल्लापूर्वक प्रचारय् हःगु ग्वसाः कार्यान्वयन याये मफयाः अलपत्र अवस्थाय् लाःगु दु। सरकारं थ्व सम्बन्धी कानून लागू याःगु थनिं लछि दत। तर आः तक थ्व ऐन छ्यलाः सुयातं कारवाही धाःसा याये फुगु मदुनि ।
स्वास्थ्य तथा जनसंख्या मन्त्रालयया कानून अधिकृत कोमलप्रसाद आचार्यं ऐन लागू जुइवं हे कार्यान्वयन समिति गठन यायेमाःगु खःसां प्राविधिक कारणं यानाः थ्व ज्या लिबानाच्वंगु खँ कनादिल। आचार्यं नीति निर्धारण व अनुगमन यानाः ऐनया कार्यान्वयन यायेत समितिं ज्या सुरु यायेधुनागु जानकारी नं बियादिल। मन्त्रालयं उच्चस्तरीय सरकारी कर्मचारीयात अनुगमनकर्ता कथं नियुक्त याये जिउगु खँ ऐनय् धयातःगु दु ।
धूमपान याइम्हेसित स्वयां नं प्रयोग याइम्ह मनुखं त्वःतीगु कुँपाखें मेपिं मनूतय्त अप्वः लिच्वः लाकीगु जुयाः हरेक नागरिकया स्वतन्त्रतपूर्वक म्वाये दइगु व स्वस्थ जुइ दइगु अधिकारयात सुनिश्चित यायेत सरकारं धूमपान निषेध ऐन हःगु खः।सार्वजनिकस्थल धायेबलय् सरकारी निकाय, शिक्षण संस्था, पुस्तकालय, विमानस्थल, सार्वजनिक शौचालय, भोजनालय, रंगशाला आदि लाः वइ ।
