प्रहरीं सुरक्षा योजना न्ह्याकल

(झीगु स्वनिगः)

नेपाल प्रहरीं मोहनि स्वन्ति लिसे छठ पर्वयात ध्यानय् तयाः न्हूगु सुरक्षा नीति लागू याःगु दु । महानगरीयं सोमवाः पत्रकार सम्मेलन यानाः नखःचखःया लसताय् मेमेगु इलय् स्वयाः अप्वःै अपराधिक घटना जुइगु जूगुलिं न्हूगु नीति लागू यानाः सुरक्षा सर्तकता छ्यलाःगु जानकारी ब्यूगु खः । नखःचखःया लसताय् छु नं अवाञ्छित घटना जुइमबीकेत आर्थिक कारोबार जुइगु फुक्क क्षेत्र, अप्वः हूल मुनीगु क्षेत्र, बिशिष्ट व्यक्तिया सुरक्षा लगायत स्वनिगःन्यंक सादा वसतय् प्रहरीया लिसलिसे मेमेपिं बिशेष प्रहरीतय्त नीप्यघौतक्क छ्यलाःगु महानगरीय प्रहरी आयुक्त ज्याकूया प्रहरी नायब महानिरीक्षक परशुराम खत्रीं जानकारी बियादिल ।

प्रहरीं बिमानस्थल, बर्सपार्कय् पाकेटमार अप्वः जुइगु धासें बिशेष सुरक्षा सतर्कता छ्यःगु दु । प्रहरीं मोहनि स्वन्तिया लसताय् सिरपाः कथं धकाः छु नं धेबा लिसे जिन्सी मकायेत फुक्क प्रहरी कर्मचारीतय्त उजं नापं बिइधुंकूगु दु । थ्वहे दथुइ प्रहरीं थीथी अपराधय् ल्हाः दुपिंत ज्वनाः सोमवाः सार्वजनिक नापं याःगु खः । न्यूरोडय् दुगु कर्नर ताजा गुादपाक व श्रीकृष्ण गुादपाक भण्डारया सञ्चालकतय्त हाकुगु बजाः याःगु द्वपनय् प्रहरीं ज्वनाः सार्वजनिक याःगु खः । उमिसं ताःहाकःगु इलंनिसें तसकं दुर्गन्धित, ध्वग्गिगु कच्चा पदार्थ ल्वाकः छ्यानाः गुादपाक उत्पादन यानाः उपभोक्तापिनिगु हित अःखः बिक्री बितरण याःगु धासें ज्वंगु खः ।

थुकथं हे प्रहरीं पेस्तोल लिसे भरुवा बन्दुक ज्वनाः जूपिं झिंखुम्हसित नं ज्वनेगुया लिसलिसे थीथी ज्यान कायेगु उद्योगय् ल्हाः तयाः बिस्युं वनाच्वंपिंत नियन्त्रणय् कयाः सार्वजनिक याःगु दु ।
अथेहे प्रहरीं थ्वहे भदौ २२ गते यलया बिशंखु नारायणया न्यय्न्यादाया मिश्री कुमारी खत्रीया हत्याय् ल्हाः दुपिंत नं प्रहरीं ज्वनाः सार्वजनिक याःगु दु । अभियुक्तपिं अनिल पाण्डे व लक्ष्मण गुरुङं न्ह्याय्पनय् तयातःगु रिङ व मंगलसुत्रया नितिं हत्या याःगु प्रहरीं जानकारी ब्यूगु खः ।