मुद्रा अपचलनय् तःधंगु बैंकया नं ल्हाः

(झीगु स्वनिगः)

अर्थमन्त्री वर्षर्मान पुनं भारतीय मुद्रा अपचलनय् तःधंगु बैंकतय्गु नं ल्हाः दुगु धयादिल । रिपोर्टर्स क्लबया साक्षात्कारय् न्वंवानादिसें अर्थमन्त्री पुनं अर्बौं तकाय् जूगु भारतीय मुद्रा अपचलनय् तःधंगु बैंकतय्गु नं ल्हाः दुगु खनेदुगु जानकारी बियादीगु खः । अर्थमन्त्री पुनं न्हापाया सरकारं संसदय् न्ह्यब्वःगु बजेटयात छु नं संशोधन मयासे असोज १ गतेतक्क पारित यायेगु धयादिल । न्हापाया सरकारं पेश याःगु बजेट संशोधन मयासे असोज १ गतेतक्क संसदपाखें पारित याकेगु विषयलय् दलतदथुइ सहमति हे जुइधुंकूगु वय्कःया धापू खः ।

अर्थमन्त्री पुनं लिबाक्क बजेट पारित जुयाः आर्थिक बृद्धिदरय् समस्या वःगुलिं न्हापायापाखें पाठ सयेकाः हे थुगुसी वइगु असोज १ गतेदुने हे बजेट पारित यायेगु कथं संसदं ज्याया धलः नापं दयेके धुंकूगु जानकारी बियादीगु खः । अर्थमन्त्रीं भ्याट छलय् यानाः काण्डया छानबिनयात नं तीब्रता ब्यूगु धासें उपयुक्त प्रक्रिया छ्यलाः उकियात सार्वजनिक यायेगु योजनाय् थःपिं दुगु नापं स्पष्ट यानादिल ।
थःम्हं देशय् लगानीमैत्री बातावरण निर्माण यायेगु प्रतिबद्धता प्वंकादिसें अर्थमन्त्री पुनं मजदुर विवादं बन्द जुयाच्वंगु सूर्य नेपाल गार्मेन्ट नं याकनं हे सञ्चालनय् हयेगु दाबी नं यानादिल ।

More Stories Like this