सरकारं विज्ञापनय् अंकुश तइन

थौं कन्हय् जिल्ला विकास समिति, गां विकास समिति व नगरपालिकां विया वयाच्वंगु विज्ञापनय् सरकारं अंकुश तयेत्यंगु दु । छु पत्रिकायात छु गुगु गाविस वा नगरपालिकां विज्ञापन वीत्यंगु खः उकियावारे सरकारयाके पूर्व स्वीकृति कयाः जक विज्ञापन वीमाःगु नियम पितवी त्यंगु दु । थुकिं यानाः थीथी लसताय् पिहां वइगु पीत पत्रपत्रिकायात छुं प्रभाव त्वःतीसा नियमित रुपं पिहां वयाच्वंगु दर्तावाल पत्रपत्रिकायात अप्वः मछिनीगु जुइगु खनेदु । सरकारया ज्या गवले तक्क सरकारी काम गवले वनी घाम जुया च्वंतले थ्व नियमया शीकार स्थानिय पत्रपत्रिकात जुइगु निश्चित खनेदु । हालै सरकारं राहतया ज्याझ्वः सार्वजनिक याःगु दु । थुकियात ग्वाहालि जुइ कथं स्थानिय विकास मन्त्रालयं नं छगू राहत जुइगुकथंयाहे ज्याझ्वः दयेकाः याकनं हे सार्वजनिक यायेत्यंगु दु, थुकी याकःमिसा, जेष्ठ नागरिक, दलित, कणर्ालीया न्यादँ क्वय्यापिं फुक्क मस्त, न्यादं क्वय्यापिं दलित, अपाङ्ग मस्ततय्त नं खुलाया सामाजिक सुरक्षा भत्ता वीत्यंगु दु ।

थ्व भत्ता सम्भवतः मोहनि न्ह्यःहे वीगु ग्वसाः दु । अथ्यहे लोप जूगु जातिया मनूतय्त नं खुलाया भत्ता इनेगु ज्याझ्वः दयेकाः याकनं पित हइगु जूगुलिं सरकारं थुगुकथंया मितव्ययिता वा खर्च म्हो यायेगु ज्याझ्वः हःगु अनुमान याःगु दु । सामाजिक सुरक्षा भत्ताय् जक मन्त्रालयं दच्छिया ८ अर्ब ५२ करोड ध्यबा खर्च याना वःगु दु । थुगसी खुलाया छक्वलं ४ करोड ३५ लख ध्यबा खर्च यायेत्यंगु खः । तर विज्ञापन वीगु प्रकृयाय् अंकूश तयेगु ज्यां खास सरकारं बचत यायेफैमखु । भनसुन व पहुंचया आधारय् ज्या पनेमफुतले थुकथंया अंकुश तयाःनं छुंहे फाइदा दइमखु । थुकिं यानाः नियमितरुपं पत्रिका पिकयाः वयाच्वंपिन्त जक समस्या जुइ । भचा भचा वइगु विज्ञापन नं मवल धायेवं पत्रिकां थप आर्थिक भार फयेमालीगु निश्चित खः । उकिं विज्ञापन धयागु नियमित रुपं पिहां वयाच्वंगु पत्रपत्रिकायात जक विज्ञापन वीगु यायेमाः । मोहनि वल स्वन्ति वल, न्हूदँ वल धकाः मात्रै विज्ञापनया लोभं पिहां वइगु व पिकाइगु पत्रपत्रिकायात जक विज्ञापन वीगु गलत खः । छुं पत्रिका नियमित खः व छु पत्रिका अनियमित खः धयागु खँया जानकारी सूचना विभागपाखें याउँक हे जानकारी कायेफै ।

स्थानिय पत्रपत्रिकायात विज्ञापन मदैगुयाहे कारणं आर्थिक वोझ क्ववुया च्वनेमाःगु दु । थ्वहे बोझं गुलिखय् पत्रपत्रिकात दिनाःनं वनेधुंकूगु दु । थुगु पृष्ठभूमिइ जिल्ला विकास समिति, गाविस व नगरपालिकापाखे वियावयाच्वंगु सीमित विज्ञापनयात नं अंकूश तयेगु धयागु पत्रपत्रिकाया विकासया ज्याय् पंगः थनेगु खः । सरकारपाखे स्वीकृत कयाः वा पूर्व जानकारी वियाः जक विज्ञापन वीगु उलि व्यवहारिक नं जुइ मखु । थुकि सरकारं खास ध्यबा बचत जुइगु नं सम्भावना म्हो जक दु । उकिं सरकारं मेमेगु क्षेत्रय् राहतया ज्याझ्वः पितवियाः ग्वाहालि याःथें पत्रपत्रिका पिहां वयाच्वंगु समस्यां ग्रस्त अवस्थायात ध्यानय् तयाः विज्ञापनय् तयेत्यंगु अंकूवायात त्वःतेमाः । बरु नियमित रुपं पिहां वयाच्वंगु पत्रपत्रिकाया नितिं नं राहतया ज्याझ्वः पितवी फत धाःसा दकले बांलाइ । राज्यया प्यंगूगु अंग धाइगु पत्रपत्रिकाया नितिं लोककल्याणकारी विज्ञापनया लिसेलिसे मेमेगु सूचना आदियात नं स्थानिय पत्रपत्रिकायात अनिवार्यरुपं उपलब्ध याकेगु व्यवस्था जुइमाः ।

More Stories Like this