'राजनीतिक व कूटनीतिक रुपं समाधान यायेमाः’

येँ (झीगु स्वनिगः)
एकीकृत नेकपा -माओवादी)या सांसद् गिरिराजमणि पोखरेलं थःपिनिगु दलया ११ म्ह नेता व सभासद्तय्त भारत पटनाया उच्च अदालतं कैद व जरिवाना सहितया सजाय न्यंगुगुलिं उगु समस्या राजनीतिक व कूटनीतिक माध्यमं ज्यंकेत सरकारया ध्यानाकर्षण यानादिल । व्यवस्थापिका संसदय् म्हिगः ई कयाः न्वंवायेगु झ्वलय् वय्कलं माओवादी जनयुद्धया इलय् भारतय् दुपिं स्वम्ह नेतातय्त ज्वनाः मुद्दा चलेयाःगु साढे दुई वर्ष जेलय् च्वनाः नेपालय् वःपिं व नेपालय् तःधंगु राजनीतिक हिउपाः, भारतीय कानुन ब्यवसायीतय्गु ग्वहालि व जनताया समर्थनय् वय्कःपिं रिहा जूगु खःसा आः वयाः अदालतं कैद व जरिवाना सहितया फैसला न्यंकूगुलिं आपत्ति नं प्वंकादिल ।

नेता पोखरेलं उगु विषययात सही व सकारात्मक कथं ज्यंकेगु नितिं तत्काल हे ज्या यायेत सरकारयात इनाप यानादिसें संसदयात तकं जानकारी बियादिल । वय्कलं नेपालय् द्वन्द्वकालय् थ्यंमथ्यं स्वसः व न्यय्म्हेसित थीथी अदालतय् विचाराधीन जुयाच्वंगु मुद्दा लित कायेत नं सरकारयात इनाप यानादिल । व्यवस्थापिका सांसद पोखरेलं असारंनिसें आः तकया दुने रुकुमय् २७ म्ह, जाजरकोटय् ३ म्ह व सल्यानय् २ म्ह नापं यानाः ३२ म्ह बाढीपहिरोपाखें सी धुंकूगुलिं सीपिनिगु परिवारयात तत्काल सरकारं राहतया ब्यवस्था यायेत नं इनाप यानादिल । भारतया जेलं तःदँ लिपा अथे माओवादीया नेतातय्त कैदी व जरिवानाया फैसला याःगु गनं माओवादीयात ख्यायेत जकं मखुला धकाः मनूतय्सं न्ह्यसः तयाहःगु दु ।