प्रचण्ड—किरण सहलह
येँ (झीगु स्वनिगः)
एकीकृत नेकपा -माओवादी)या निम्ह शीर्ष नेतात नायः पुष्पकमल दाहाल प्रचण्ड व बरिष्ठ न्वकु मोहन बैद्य किरणया दथुइ म्हिगः सोमवाः सहलह जूगु दु । माओवादीया लडाकु समायोजन, शान्ति प्रक्रिया, सरकार, संविधान निर्माणया बारे नं सहलह ब्याकेगु ज्या जूगु खः । प्रचण्ड निवास नयाँबजारय् अथे सहलह ब्याकेगु झ्वलय् असोजया निगूगु वालय् जुइगु माओवादीया केन्द्रीय कमिटीया मुँज्याया बारे नं सहलह जूगु खः।
अथे हे प्रचण्डं माओवादीया मूछ्याञ्जे रामबहादुर थापा बादललिसे नं सहलह ब्याकादीगु दु । उगु हे कथं प्रचण्डं पार्टीया न्वकु नापं प्रधानमन्त्री डा. बाबुराम भट्टराईलिसे नं सरकारया बारे सहलह ब्याकादीगु खः । माओवादी दुने लाईन संघर्ष तच्वयाः वनाच्वंगु नापं कन्टेनरया ताःचा लःल्हाःगु विषययात कयाः विवाद जुयाच्वंगु अवस्थाय् अथे शीर्ष नेतातय्गु दथुइ सहलह जूगुयात मनूतय्सं अर्थपूर्ण रुपं कयाहःगु दु ।
