कार्यकर्तातपाखें कांग्रेसया नेतायात आक्रमण

येँ (झीगु स्वनिगः)

नेपाली कांग्रेसया जिल्ला सभापतिं हे अभियुक्त कार्यकर्तायात संरक्षण मयात धकाः कांग्रेसया हे कार्यकर्तातय्सं आक्रमण यायेगु घटना जूगु दु । अभियुक्तयात संरक्षण मयाःगुलिं धकाः कांग्रेसया भातृ संगठन नेपाल तरुण दलया कार्यकर्तातय्सं चितवनया कांग्रेस जिल्ला सभापति विकास कोइरालायात म्हिगः सनिलय् ज्याकुथिइ हे आक्रमण याःगु खः । सनिलय् ज्याकुथिइ च्वनाच्वंम्ह कोइरालायात तरुण दलया कार्यकर्तात वयाः आक्रमण याःगु खः धकाः नेपाली कांग्रेस चितवनं धाःगु दु । अथे जिल्ला सभापतियात आक्रमण यायेवं हे कार्यकर्तातय्सं धाःसा पना ब्यूगु खः । नेपाल तरुण दलया कार्यकर्तातय्सं धाःसा म्हिगः न्हापां जिल्ला सभापतिं हे आक्रमण याःगु खः धकाः दावी याःगु दु ।

उगु घटनायात कयाः प्रहरीं निम्ह कार्यकर्तातय्त ज्वंगु दु । अन ल्वापु तच्वइगु संभावना दुगुलिं बहनी जुइवं ब्यापक रुपं प्रहरी परिचालन याःगु दु । वंगु भदौ १० गते अनया विलास वडा नं. ५ या सञ्जय लामायात गोलीं कयेकाः स्यानाब्यूगु घटना जूगु खः । उगु आक्रमणया घटनाया अभियोगय् नेपाल तरुण दलया जिल्ला सभापति शिव पौडेल व भरतपुर नगरया न्वकु प्रमिस राईयात ज्वनाः प्रहरीं कुनातःगु दु । वय्कःपिन्त त्वःतकेगु नितिं जिल्ला सभापतिं माःगु कथं भूमिका म्हितेगु ज्या मयात धकाः तरुण दलया कार्यकर्तातय्सं दबाव बियाः वयाच्वंगु खः । उगु घटनालिपा कांग्रेसया जिल्ला समिति तकं स्पट रुपं हे विभाजीत जुयाः वनाच्वंगुलिं ल्वापु तच्वयाः वःगु खः धकाः धाःगु दु । थ्व हे झ्वलय् नेपाली कांग्रेसया चितवन जिल्ला सभापति कोइरालाया विपक्षय् दुपिं तरुण दलया कार्यकर्तातय्सं चितवन बन्द तकं आह्वान याःगु खः ।