पटना फैसलां माओवादी गम्भीर

फैसला हीकेत राजनीतिक व कुटनीतिक पहल याइगु

येँ (सन्ध्या टाइम्स)/भारतया पटना अदालतं नेपाःया ११ म्ह माओवादी नेतातय् विरुद्ध नकतिनि याःगु फैसलायात कयाः माओवादी दुने गम्भीर छलफल जुइगु खँ सीदुगु दु। पटना अदालतया उगु फैसलायात माओवादीं गम्भीरतापूर्वक काःगु दुसा उकियात कयाः कुटनीतिक रुपं पहल यायेगु बारे बिचाः जुयाच्वंगु खँ धाःगु दु ।

पटना अदालतं सजायँया फैसला न्यंकूपिं सुं छम्ह हे माओवादी नेतां भारतय् वनाः अपराध याःगु मदुगु कारणं यानाः फैसला मिले मजूगु तर्क माओवादीं तःगु दु।
भारतं सजायँया फैसला न्यंकूपिं झिंछम्ह मध्ये छम्ह सभासद् दिलीप महर्जनं थौं 'सन्ध्या टाइम्स'लिसे खँ ल्हासें थुकिया बारे थःपिंसं थौं हे प्रधानमन्त्री व परराष्ट्र मन्त्रीयात नाप लानाः खँ ल्हायेत्यनागु जानकारी बियादिल ।

थःपिंत पटनाय् ज्वनाः कुंगु अवस्था व आःया अवस्था दथुइ यक्वं हिउपाः वयेधुंकूगु खँ धासें वय्कलं धयादिल, 'थज्याःगु अवस्थाय् तकं अज्याःगु फैसला वयेगु धइगु नेपाःयात स्वयेगु भारतया मिखा अझ नं बांलाः मजूनि धइगु स्पष्ट जूगु दु। थ्व धइगु भारतया विस्तारवादी नीतिया हे उपज खः ।'

पटनाया जेलं थःपिंत त्वःतकेगु लागिं अबलय् साक्षी च्वना बिउपिं भारतीय पासापिंत थौंकन्हय् अन दुःख बीगु ज्या समेत जुयाच्वंगु खँ नं वय्कलं कनादिल। पटना अदालतया थज्याःगु फैसला वयेवं उकी नां दुथ्याःपिं सकस्यां थौं मंकाः रुपं प्रधानमन्त्री वा परराष्ट्र मन्त्री नापलानाः याकनं हे राजनीतिक व कुटनीतिक पहल पाखें खँ ल्हायेत इनाप याःगु दु। वय्कःपिंत अदालतं कैद सजाय समेत न्यंकूगु कारणं छुं ज्या जुयाः यदि वय्कः नेतात भारत वन धाःसा अन वय्कःपिंत गिरफ्तार समेत यायेफुगु खँ नं सभासद् महर्जनं कनादिल ।

सजायँ न्यंकूपिं माओवादी नेतात
भारतया पटना अदालतं माओवादीया झिंछम्ह नेतातय्त राज्यद्राह याःगु अभियोगय् थ्व सजायँया फैसला न्यंकूगु खः। वय्कःपिंत ३ लाख ७५ द्वः भारु निसें ७ लाख भारु तक बं व निदँनिसें खुदँ तकया कैद बीगु खँ नं दु। थ्व सजायँ लोकेन्द्र बिष्ट, कुलप्रसाद केसी, हितबहादुर तामाङ, अनिल शर्मा, कुमार दाहाल, चित्रबहादुर श्रेष्ठ, दिलीप महर्जन, तारा घर्तिमगर, श्यामकिशोर यादव, सुमन तामाङ व मीनप्रसाद आम्गाइँपिनि विरुद्ध न्यंकूगु खः ।