आखिर गन वंगु जुल ले प्रचण्ड?



येँ (सन्ध्या टाइम्स)/शुक्रवाः निसें बेपत्ता जुयाच्वंम्ह माओवादी अध्यक्ष प्रचण्ड म्हिगः आकाझाकां विराटनगर विमानस्थलय् खने दयेकः झाल। तर वय्कः गनं लिहां वःगु खः धइगु खँ धाःसा सुनां नं मसिउ। वय्कः म्हिगः हे येँय् लिथ्यंकादीगु दु ।

अप्वःसिनं वय्कः भारतया सिलगुडी हे वंगु जुइमाः धकाः अनुमान याःगु दु। भारतया अंग्रेजी न्हिपौ 'द टाइम्स अफ इण्डिया' या अनलाइन संस्करणय् अध्यक्ष प्रचण्ड सिलगुडी वनाः भारतीय नेतात नापलाः वंगु जुइमाः धकाः समाचार तयातःगु दु। उकी धयातः कथं आः छुं ई लिपा हे प्रधानमन्त्री डा. बाबुराम भट्टराई भारत भ्रमणय् वनेत्यंगु दु। प्रम भट्टराई भारत थ्यने न्ह्यः हे भारतीय नेतात नापलानाः थःगु खँ निं 'सेट' यायेगु लागिं प्रचण्ड सिलगुडी झाःगु जुइमाः धकाः नं उकी धयातःगु दु ।

अध्यक्ष प्रचण्ड वंगु शुक्रवाः निसें 'बेपत्ता' जुयाच्वंगु खः। पूर्वपाखे वंम्ह अध्यक्ष प्रचण्ड शुक्रवाः आकाझाकां बेपत्ता जुइवं वय्कःयात मालेत प्रहरी नापं कडा रुपं सक्रिय जूगु खः। तर वय्कः गन वंगु खः धइगु खँ धाःसा पत्ता लगे मजू। न्हापा न्हापा नं भारतीय नेतात नापलाये माल कि माओवादी नेतात भारतया सिलगुडी हे वनीगु खः। उकिं आः नं वहे अनुमान जूगु खः ।