कुमारीया हनाय् क्वहितिइ स्वंगू तोप

येँ (सन्ध्या टाइम्स)/ म्हिगः कुमारीया क्वःनेयाः न्यायेकेगु झ्वलय् क्वहिति त्वालय् कुमारीयात स्वंगू तोपया सलामी बियाः लसकुस यात। लिसें गणेश व भैरवयात निगू निगू तोपया सलामी बिउगु खः। वसपोलपिंत गुर्जुया पल्टनं तोप न्यायेकाः सलामी बिउगु खः। क्वःनेयाः विशेष रुपं न्यायेकेगु झ्वलय् स्थानीय जैशीदेवल युथ क्लबया ग्वसालय् कुमारी, गणेश, भैरव लिसें लाखे, सवःभकु, पुलुकिसि व दीप्याखंया द्यःगंछियात हे सम्हय् छायेगु ज्या नं जूगु खः। लिसें जोशी देगःया न्ह्यःने न्यासः किलोया बजि व ७ किलोया न्या सहितया सम्हय्द्वँ नं छाःगु खः। क्लबपाखें वंगु प्यदँ न्ह्यवंनिसें क्वःनेयाः झःझः धायेकेत क्वहिति लागाय् थीथी कथंया ज्याझ्वः याना वयाच्वंगु दु ।