प्यंगू सफू छगू जुयाः पिदन
नांजाःम्ह बाखं च्वमि हरिशंकर रंजितकारया पिहां वयेधुंकूगु प्यंगुलिं बाखं सफू आः छगू हे सफूया रुपय् पिहां वःगु दु। 'हरिशंकर रंजितकारया बाखं' नां तयाः पिहां वःगु उगु सफू नकतिनि छगू ज्याझ्वःया दथुइ सत्यमोहन जोशी, डा. जनकलाल वैद्य, माधवलाल कर्माचार्य व दुर्गालाल श्रेष्ठं मंकाः कथं विमोचन यानादिल। छगू हे जुयाः पिहां वःगु सफुली वय्कःया पिहां वयेधुंकूगु बाखं सफूत कंगाः, कँचा, कंमा व कंझाः दुथ्यानाच्वंगु दु। थ्व प्यंगुलिं सफुली वय्कःपिं हे प्यम्हेस्यां भूमिका च्वयादीगु खः ।
सफूया उलेज्या यानादिसें सत्यमोहन जोशीं बाखं च्वमि
रंजितकारया बाखं च्वयेगु शैलीया प्रशंसा यानादिल। लिसें नेपालभाषा साहित्ययात अन्तर्राष्ट्रिय ख्यलय् विस्तार यायेत अनुवादया व्यवस्था यायेमाःगु बिचाः प्वंकादिल।
डा. जनकलाल वैद्यं च्वमिं थःगु बाखनय् राष्ट्रवादी धाःयात बांलाक ज्वनादीगु खँ कनादिल ।
समालोचक माधवलाल कर्माचार्यं समाजय् खने दइगु चिचीधंगु खँयात नं च्वमिं सुन्दर बाखं दयेकाः प्रस्तुत यानादीगु दु धयादिल। जनकवि दुर्गालाल श्रेष्ठं हरिशंकर रंजितकार थेंज्याःपिं साहित्यकारत दत्तले नेपालभाषा साहित्य च्वन्ह्याना हे च्वनी धयादिल ।
ज्याझ्वःया निगूगु ब्वय् च्वमि रंजितकार व वय्कःया छेँजःपिंसं नेपालभाषा ख्यलय् थीथी कथंया ग्वाहालि याना वयाच्वनादीपिं भूषण प्रसाद श्रेष्ठ, नातिवज्र वज्राचार्य, विपिन कपाली व शीला साय्मियात दां सिरपाः नं बिउगु खः ।
बाखं च्वमि रंजितकारया उगु सफू च्वसापासां पिथंगु खः। च्वसापासाया नायः पद्मरत्न तुलाधरया सभापतित्वय् जूगु उगु ज्याझ्वलय् छ्यांज्ये भूषणप्रसाद श्रेष्ठं सफू व च्वमिया म्हसीका बियादीगु खः ।
