तःमुँज्या न्ह्याकेत ख्वपन्यंकं चिचीधंगु निं मुँज्या

ख्वप (सन्ध्या टाइम्स)/वइगु कौलाथ्व द्वादशी व त्रयोदशी निन्हुयंकं ख्वपया खलाँ त्वालय् जुइगु स्वीछक्वःगु नेपालभाषा साहित्य सम्मेलन ताःलाक न्ह्याकेत तयारी स्वरुप आदर्श आजाद उच्च माविइ च्वमि साहित्यकारतय् मुँज्या जुल। ज्याझ्वलय् नेमकिपाया नायः नारायणमान बिजुक्छेँ रोहितं साहित्य च्वइपिं मनूतय्सं जनताया भावनायात थुइकाः सरल ढंगं रचना च्वयेमाःगु सुझाब बियादिल ।

तःमुँज्या मू गुथिया लिउ छ्याञ्जे लक्ष्मीनारायण दुवालया सभापतित्वय् जूगु उगु ज्याझ्वलय् सहभागी थीथी च्वमि साहित्यकारतय्सं न्यंगु न्ह्यसःया लिसः बीगु झ्वलय् ज्याझ्वःया मूपाहां नारायणमान बिजुक्छेँ रोहितं समसामयिक व राजनीतिक विषयबस्तुं जनतायात याकनं थुइकेगु व जागरुक याइगु खँ कनादिल। वइगु भाद्र ३० गते तःमुँज्यां हाकनं बागीश्वरी उमाविइ चिमुँज्या ज्याझ्वः यायेत्यंगु दु ।