लडाकुयात चुनावय् छ्यलेगु माओवादी दाउ



येँ (सन्ध्या टाइम्स)/नेपाली कांग्रेसया सभापति सुशील कोइरालां आः वइगु चुनावय् थःपिनि लडाकु प्रयोग यानाः चुनाव त्याकेगु रणनीति कथं हे माओवादीं शान्ति प्रक्रियाय् आलटाल यानाच्वंगु द्वपं बियादीगु दु। थौं विराटनगरया कोइराला निवासय् पत्रकारतलिसे खँ ल्हासें वय्कलं थ्व बिचाः प्वंकादीगु खः ।

चुनाव कब्जा यानाः देशय् हानं एकदलीय शासन हे लागू यायेगु माओवादीया दाउ खनेदु धासें वय्कलं थ्वहे कारणं यानाः माओवादीया लडाकु निं दकलय् न्हापां समायोजन यायेमाः धकाः बः बियाच्वनागु खः धकाः कनादिल।माओवादीया ७ हजार लडाकु समायोजन यायेमाः धकाः वयाच्वंगु दावीयात नं वय्कलं खण्डन यानादिल । वय्कलं धयादिल, 'गिरिजाबाबुलिसे माओवादीं ३ हजार समायोजन यायेगु धकाः सहमति दयेकातःगु खः। उकुन्हु कांग्रेसया बैठकं उकियात बढे यानाः ४ हजारसमायोजन यायेगु धकाः निर्णय यानागु दु। थुकी कांग्रेस जक क्वमिलु जुयां मजिउ, माओवादी नं क्वमिलु जुयाः क्यनेमाः।' वय्कलं शान्ति प्रक्रियाया ज्या बांलाक मजूतले मेगु खँ न्ह्यःने वनी मखु धकाः नं धयादिल ।