माओवादी विभाजनया खतरा

माओवादीया वरिष्ठ नेता मोहन वैद्य किरणं यदि थःत पार्टीया संस्थापन पक्षं बहुमतया दम्भ क्यनाः कारवाही यात धाःसा मेगु हे पार्टी चायेकेगु धकाः तयारी यानाच्वंगु समाचार पिहां वःगु दु। माओवादीया स्वम्हं वरिष्ठ नेतातय्सं उकुन्हु तिनि गोरखाया छगू ज्याझ्वलय् न्ववासें पार्टी तज्याइ मखु धकाः कार्यकर्तायात आश्वस्त याःगुयां छुं न्हि लिपा हे थज्याःगु समाचार पिहां वःगु निश्चय नं बांलाःगु संकेत मखु ।

उपाध्यक्ष मोहन वैद्यं कन्टेनरया ताःचा लःल्हायेगु धकाः याःगु पार्टीं याःगु निर्णयया विरोधय् गुगु वक्तव्य बीगु ज्या यात व पार्टी पद्धति अनुरुप मखु, उकिं वय्कःयात कारवाही यायेगु जुइ धकाः पार्टीया छुं नेतातय्सं धायेगु याना हःगु दुसा उकियात हे लिसः बी कथं वैद्यं नं यदि बहुमतया दम्भ क्यनाः थःपिंत कारवाही यात धाःसा थःपिंसं नं संविधान दुनें हे मेगु पार्टी गठन यायेगु जुइ धकाः ख्याच्वः बियाहःगु खः। उकिया लागिं वय्कलं दुनें दुनें तयारी समेत यानादीगु नं समाचारय् उल्लेख दु ।

थौंकन्हय् माओवादी दुने गुगु तच्वःगु विवाद खने दया वःगु खः, उकियात स्वयाः धायेगु खःसा पार्टी तज्याइगु हे जकं खः लाकि धइगु ग्याःचिकु तकं कार्यकर्तातय्के खने दया वःगु दु। थ्व स्वाभाविक खः। थ्व ई माओवादी विभाजन जुइगु धइगु छगू पार्टी जक विभाजन जुइगु मखु। माओवादीया विभाजनं देशय् न्ह्यानाच्वंगु शान्ति प्रक्रिया, सेना समायोजन लगायतया फुक्क हे प्रक्रियात अवरुद्ध याना बीगु निश्चित दु। माओवादीया विभाजन थ्व इलय् देशया लागिं हे दुर्भाग्य जुइगु खँय् शंका मदु। पार्टी नेतृत्व थुकी अवश्य नं गम्भीर जुइमाः ।

More Stories Like this