येँयाः नखःयात नखःकथं हने

वंगु द्वादसिं निसें छवाःया येँया नखः न्ह्याःगु दु । येँया मरुत्वाः व हलुमान ध्वाखा जःखः केन्दि्रत जुइगु येँया नखः यात नेवाःतय्सं विशेष नखःकथं न्ह्याइपुक्क हनीसा गैरनेवाःतय्सं थुकियात अजूगतिया मिखां स्वस्थं न्ह्याइपुकेत थःपिं नं सहभागी जुइ । येँयाःया मू जात्रा क्वन्याःया कुमारी खः सालेगु व पुन्हि खुन्हु थन्याः खुन्हु उत्तरी भेगय् सालेगु याइ । निन्हुंयंकं जुइगु थुगु कुमारी खः सालेगु जात्राय् येँया नेवाःत सकलें सहभागी जुइ । इतिहासयात पुइकाः स्वयेगु खःसा थ्व येँयाः नखःयात विस्तार यायेगु ज्याझ्वः न्ह्यानावःगु दु । सी मदयेक उगु नखःयात परम्परा व सांस्कृतिक धंगं हनावयाच्वंगुया नापनापं समय् बजि ब्वयेगु, द्यः देगः छाय्पीगु, पुजा आजा यायेगु व अज्ज सम्भव दतधाःसा भ्वय् हे नयेगु ज्याझ्वलं छवाःया न्हि नेवाःतय्गु नितिं तसकं व्यस्तगु नखःकथं हनेगु यानाहःगु दु । येँयाःनिश्चितरुपं नेवाःतय्गु नितिं तःधं सांस्कृतिक व धार्मिक रुपं नं नखःयात तःधंगु महत्व वियाःहनेगु याइ । तर ऐतिहासिकरुपं स्वल धाःसा शाहवंशया जग तःम्ह पृथ्वीनारायणं येँ कब्जा याःगु न्हि खः । नेवाःत नखलय् मस्त जुयाच्वंगु इलय् आपुलुखुं आक्रमण यानाः येँया स्वनिगः थःगु कब्जाय् काःगु न्हि जूगुलिं थुकिया गम्भीररुपं कायेमाःगु खः । तर नेवाःतय्सं थुखेपाखे गवलेहे उलि विचाः तक्कनं याःगु खनेमदु । वहे उल्लास, वहे जोशं थःपिनिगु मौलिक संस्कृति व परम्परागत अज्ज अप्वः थाय् वियाः हनेगु यानावयाच्वंगु दु ।

येँयाः नखःया झ्वलय् याइगु गुलि नं गतिविधित दु, उकी थीथी गुथित नं स्वाकाः हयातःगु दु । नेवाःतय्गु थीथी गुथित मध्ये येँया वलय् अप्वः हे गुथित थ्व नखःयात हनेगु यानावयाच्वंगु दु । उकीसनं आयस्ता दुगुयात निरन्तरता वीगुला जुहे जुल, नापनापं न्हू न्हूगु व्यवस्था यानाः गुथिाया रुप वीगु कुतःत नं यानावयाच्वंगु खनेदु । तर थ्व नखलय् नेवाःतय्सं लगानी याःथें नेवाःतय्गु ल्हातय् छुं लवः वयाच्वंगु दु लाकि मदु ? विचाः थुखेपाखे नं यायेगु ई वःगु दु । येँयाःया नखः हनेत थीथी गुथि प्याखं आदि यात खर्च वीगु झ्वलय् येँ महानगरपालिका, गुथि संस्थान लगायत सरकारी व गैर सरकारी संस्थात अतिकं सकृय जूगु खनेदु । येँ महानगरपालिकायाके द्वलंद्वः ध्यबा कायेगु अले थःगु त्वाःत्वालय् समय्वजि ब्वयाः बहनीइ भ्वय् नयेगु प्रवृत्तिं अप्वः थाय् कयाहयाच्वंगु खनेदु । स्थानिय क्लव, संघ संस्थात थुगु ख्यलय् अप्वः न्ह्यःने लाः । समय् बजि ब्वयेत धकाः महानगरपालिका वा स्थानिय जनतायाके हापं कयाः द्यः पुज्यायेगु, म्येय् स्यायेगु, समय् वजि ब्वयेगु, भ्वय् नयेगु अले अय्लाः त्वनाः थःथवय् घोरा घोर ल्वायेगु झीगु परम्परा मखु, विकृति जक खः । देशय् गणतन्त्र वयेवं माओवादीया सरकार वयेवं थुज्वःगुकथंया म्वाःमदुगु ज्या मयेकेगु धकाःआर्थिक ग्वाहालि जक पनेवं थुकिइ नेवाः संस्कृतिया विरोधीतय्सं हःपाः व लिधँसा वियाः तामाशा क्यंगु सुयां लोमंकूगु खइमखु ।

विकृत्ति धयागु विकृत्तिहे खः, उकियात धर्म संस्कृति व परम्परा नाप स्वाकेगु ज्या यायेमज्यू । समय् बजि तयाः वा ब्वयाः वा भ्वय् नयाः झी थहां वइमखु । झीगु कल्याण जुइगु ज्या जक संस्कृति जुइ, परम्परा जुइ । झीत थःथवय् ल्वाकेगु दुःख वीगु ज्याखं म्हिगःनं विकृति खः, थौंनं विकृति खः । थुकियात कयाः छकः विचाः याना स्वयेगु जकं खःला ?

More Stories Like this