माधवं नं कांग्रेसया हे भाय् ल्हानाहल
येँ (झीगु स्वनिगः)
न्हूगु नेपाः, गणतन्त्र व संघीयताया नितिं झिदँ तक जनयुद्ध याःपिं जनसेनायात नेपाली कांग्रेसं गुगु कथं सेनाय् न्हू भर्ना कायेगु थें यानाः ब्यक्तिगत रुपं जक समायोजन यायेगु जुइ धकाः धयाच्वंगु खः आः वया व हे भाय् एमालेया बरिष्ठ नेता माधव कुमार नेपालं नं धयाहःगु दु । संविधानसभाया चुनावय् निगू हे थासं नेपाली जनतां पराजीत याना ब्यूसां नं एकीकृत माओवादीं एमालेया बरिष्ठ नेता जूगु ल्याखं मनोनित सांसद्सां यायेमाः धकाः सभासद् दयेकाब्यूम्ह नेपालं हे माओवादीया जनसेनाया विरुद्ध उगु कथं न्वंवानाहःगुलिं मनूत अजू चाःगु दु ।
म्हिगः आइतवाः येँय् संचारकर्मीतलिसे खँ ल्हायेगु झ्वलय् उगु कथं कांग्रेसया भाय् ल्हानादीगु खः । म्हमस्यूपिं मनूतय्गु आक्रमणय् लानाः घाःपाः जुयाः येँया बी एण्ड बी अस्पतालय् वासः याकाच्वंम्ह युवा संघ नेपालया सचिवालय दुजः कमल पाठकयात नापलायेगु झ्वलय् वनादीम्ह नेपालं संचारकर्मीतलिसे खँल्हासें धयादिल 'लडाकुत समुहगत रुपं गुगु नं हालतय् समायोजन जुइमखु, उकियात स्वीकार हे याये फैमखु ।' वय्कः नेपालया खँ न्यनाः उगु इलय् अस्पतालय् दुपिं मनूत तकं अजूचायाः माधव नेपालं भारतया योजना कथं जकं अथे कांग्रेसया भाय् ल्हानाः हःगु मखुला धकाः टिप्पणी याःगु दु ।
