कांग्रेसय् बहुमतं पेलेयाइगु
येँ (झीगु स्वनिगः)
नेपाली कांग्रेस दुने भातृ संगठनयात कयाः ल्वापु झन झन तच्वयाः वःगु दुसा आः बहुमतं अल्पमतयात पेले यायेगु तयारी याःगु दु । कांग्रेसया भातृ संगठन महिला संघ, किसान संघ व नेपाल तरुण दलयात कयाः नेतातय् दथुइ ल्वापु जुयाः वयाच्वंगु खः । कांग्रेसया दक्ले सशक्त जुयाच्वंगु भातृ संगठनयात कयाः विवाद झन झन तच्वयावःगु खःसा आः पार्टीया सभापति सुशील कोइराला येँय् थ्यने धुंकाः पार्टीया केन्द्रीय कमिटीया मुँज्या च्वनाः अल्पमत पक्षयात पेलेयानाः भातृ संगठनत विघटन यानाः वंनेगु तयारी याःगु खः ।
सभापति कोइराला विराटनगरं कन्हय् मंगलवाः तकया दुने थ्यंकः वइ धाःगु दु । कांग्रेसया सभापति सुशील कोइराला, उपसभापति नापं संसदीय दलया नेता रामचन्द्र पौडेल, महामन्त्री प्रकाशमान सिंह लगायतया नेतात संस्थापन पक्ष धकाः भातृ संगठनया म्याद फुइ धुंकूगु जूगुलिं आः विघटन यानाः वनेमाः धकाः अडान कयाः वयाच्वंगु खःसा पार्टीया बरिष्ठ नेता शेरबहादुर देउवा पक्षधर नेतातय्सं धाःसा भातृ संगठन गुगु नं हालतय् विघटन याये मजिउ धकाः अडान कयाः वयाच्वंगु दु । विशेष यानाः भातृ संगठन शेरबहादुर देउवा पक्षधरया कब्जाय् दुगु संस्थापन पक्षया विश्लेषण यानाः अथे भातृ संगठनत विघटन यायेमाः धकाः अडान कयाः वयाच्वंगु खः । आःया अवस्थाय् देउवां भातृ संगठन विघटनयात स्वीकार मयात धाःसा बहुमतं पेलेयानाः जूसां वनेमाः धकाः आन्तरिक रुपं गृहकार्य तकं यायेगु सुरु याःगु दु ।
